काठमाडौं । युरो–२०२४ को ‘ग्रुप अफ डेथ’बाट स्पेन र इटाली अन्तिम–१६ मा प्रवेश गरेका छन् । सोमबार राति दुवै टिमले प्रि–क्वार्टरफाइनलमा स्थान निश्चित गरेका हुन् ।

समूह चरणको अन्तिम खेलमा स्पेनले अल्बानियालाई १–० हरायो । यसै समूहको अर्को खेलमा साविक विजेता समेत रहेको इटालीसँग १–१ को बराबरीमा रोकिएपछि क्रोएसियाको यात्रा समाप्त भएको हो । क्रोएसिया सन् २०१८ को फिफा विश्वकपको उपविजेता र २०२२ मा तेस्रो भएको टिम हो ।

जितसँगै समूह ‘बी’को शीर्ष स्थान हासिल गरेको स्पेनले तीन खेलबाट नौ अंक जोड्यो । समान खेलबाट चार अंकको इटाली समूह उपविजेताका रूपमा प्रि–क्वार्टरफाइनलमा पुगेको हो ।

तेस्रो स्थानमा सीमित क्रोएसियाले तीन खेलबाट दुई अंक मात्र हासिल गर्‍यो । तालिकाको पुछारको अल्बानिया एक अंकसहित घर फर्कियो ।