काठमाडौं । रोमाञ्चक खेलमा बंगलादेशविरुद्ध आठ रनको जित निकाल्दै अफगानिस्तान आईसीसी ट्वान्टी–२० विश्वकपको सेमिफाइनलमा प्रवेश गरेको छ । अफगानिस्तान सेमिफाइनल प्रवेश गर्ने चौथो टोली बनेको हो । विश्वकपको इतिहासमा अफगानिस्तान पहिलोपटक सेमिफाइनलमा प्रवेश गरेको हो ।

मंगलबार किंग्सटाउनमा टस जितेर ब्याटिङमा आएको अफगानिस्तानले निर्धारित २० ओभरमा पाँच विकेट गुमाएर ११५ रनको योगफल खडा गरेको थियो । तर, वर्षाका कारण बंगलादेशले १९ ओभरमा ११४ रनको लक्ष्य पाएको थियो । 

बंगादेशलाई जितका लागि अन्तिम दुई ओभरमा १२ रन आवश्यक थियो । अफगानिस्तानबाट १८औँ ओभरमा बलिङका लागि आएका नवीन उल हकले सुरुआती तीन बलमा लगातार तीन रन खर्चिएका थिए । तर, चौथो बलमा बंगलादेशका ताक्षिन अहमेदको विकेट लिँदै नवीनले अफगानिस्तानको सम्भावना कायमै राखेका थिए । 

बंगलादेशबाट अन्तिम ब्याटरका रूपमा मैदान आएका मुस्ताफिजुर रहमानलाई पनि नवीनले पाँचौँ बलमा एलबीडब्लूलको धरापमा पारेपछि अफगानिस्तानले ट्वान्टी–२० विश्वकपमा नयाँ इतिहास बनाएको हो । 

बंगलादेशका ओपनर लिटोन दासले ५४ रन बनाए पनि टिमको हार टार्न सकेनन् । अन्तिमसम्म अविजित रहेका दासले ४९ बलमा पाँच चौका र एक छक्का प्रहार गरे । यसबाहेक, बंगलादेशका अन्य ब्याटरको प्रदर्शन उल्लेखनीय भएन । तोहिद ह्रृदोयले १४ र सौम्य सरकारले १० रन थपे । 

बंगलादेशलाई सस्तैमा रोक्न नवीन उल हक र राशिद खानले समान चार विकेट लिए । ३.५ ओभर बलिङ गरेका नवीनले २६ रन खर्चिए । चार ओभर बलिङ गरेका राशिदले २३ रन खर्चिए । फजलहुक फारुकी र गुलबद्दिन नैबले समान एक विकेट हात पारे । 

त्यसअघि अफगानिस्तानका रहमनुल्लाह गुबर्जले ४३ रन बनाएका थिए । राशिदले १९, इब्राहिम जद्रानले १८ र अज्मतुल्लाह ओमरजाईले १० रन थपे । बंगलादेशका रिसाद हुसैनले तीन विकेट लिए । ताक्षिन र मुस्ताफिजुर रहमानले समान एक विकेट लिए । 

जितसँगै अफगानिस्तान सुपर–८ को समूह–१ बाट दोस्रो स्थानमा रहँदै सेमिफाइनलमा प्रवेश गरेको हो । अफगानिस्तानले तीन खेल खेल्दा चार अंक जोडेको छ । अफगानिस्तानको जितले सन् २०२१ को विश्वकप विजेता अस्ट्रेलिया भने सुपर–८ बाटै बाहिरिएको छ । तालिकाको तेस्रो स्थानमा सीमित बनेको अस्ट्रेलियाले तीन खेलबाट दुई अंकमात्र जोड्न सक्यो । तालिकाको पुछारमा रहेको बंगलादेश भने सुपर–८ मा जितविहीन रह्यो । अफगानिस्तानले अब फाइनल प्रवेशका लागि समूह–२ को विजेता दक्षिण अफ्रिकाविरुद्ध खेल्नेछ ।