सिड्नी । विकिलिक्सका संस्थापक जुलियन असान्ज र अमेरिकाबीच भएको सहमति र बेलायतको जेलबाट उनको रिहाइबारे अस्ट्रेलियाका प्रधानमन्त्री एन्थानी अल्बानिजले संक्षिप्त धारणा राखेका छन् ।

अस्ट्रेलियाका प्रधानमन्त्रीका प्रवक्ताले जारी गरेको वक्तव्यमा उल्लेख छ, “अस्ट्रेलियन नागरिक जुलियन असान्जको कानुनी प्रक्रिया अमेरिकामा अघि बढेको बारे हामी जानकार छौँ । अस्ट्रेलियन सरकारले असान्जलाई निरन्तर कन्सुलर सहयोग उपलब्ध गराइरहनेछ ।”

वक्तव्यमा अगाडि भनिएको छ, “प्रधानमन्त्री अल्बानिज प्रस्ट हुनुहुन्छ, असान्जको मुद्दा धेरै लामो समयसम्म तानिएको छ । उनलाई निरन्तर कारावासमा राखेर प्राप्ति केही पनि थिएन ।”

गएको अक्टोबरमा भ्रमणका क्रममा ह्वाइट हाउसमा उनले यो विषय उठाएका जनाइएको छ । त्यति बेला असान्जबारे उनले भनेका थिए– अति भइसक्यो, यसलाई निष्कर्षमा पुर्‍याउनुपर्छ ।

यस्तै, अस्ट्रेलियाका विभिन्न पार्टीले एक मतले असान्जलाई घर जान दिन बेलायत र अमेरिकासँग अनुरोध गरेका थिए । गत वर्ष अस्ट्रेलियाका सांसदले पनि अमेरिका भ्रमण गरेर उनलाई छुटाउन ‘लबिइङ’ गरेका थिए ।

अब असान्ज अमेरिकी अदालतमा एकपटक हाजिर भएपछि अस्ट्रेलिया फर्कने तय छ । बीबीसीबाट ।

• कता उडे असान्ज ? संसारभरिबाट ‘ट्रयाकिङ’
• विकिलिक्सका प्रमुख जुलियन असान्ज जेलमुक्त, अमेरिकी प्रशासनसँग सहमति