![वेस्ट इन्डिजलाई हराउँदै दक्षिण अफ्रिका सेमिफाइनलमा](https://12khari.top/uploads/posts/efdsag-1719213653.jpg)
काठमाडौं । सहआयोजक समेत रहेको वेस्ट इन्डिजविरुद्ध डकवर्थ लेविस पद्दति (डीएलएस)अनुसार तीन विकेटको जित निकाल्दै दक्षिण अफ्रिकाले आईसीसी ट्वान्टी–२० विश्वकपको सेमिफाइनलमा स्थान पक्का गरेको छ ।
सोमबार नर्थ साउन्डमा टस जितेर ब्याटिङमा उत्रिएको वेस्ट इन्डिजले निर्धारित २० ओभरमा आठ विकेट गुमाएर १३५ रन बनाएको थियो । वर्षाका कारण खेल प्रभावित बन्दा दक्षिण अफ्रिकाले १७ ओभरमा १२३ रनको लक्ष्य पाएको थियो । उक्त लक्ष्य दक्षिण अफ्रिकाले पाँच बल बाँकी छँदै सात विकेट गुमाएर पूरा गर्यो ।
दक्षिण अफ्रिकाको जितमा ट्रिस्टान स्टुब्सले २९ रन बनाए । हेनरिक क्लासेनले २२, मार्को जान्सेनले २१, कप्तान आइदेन मार्करमले १८ र क्विन्टन डी ककले १२ रन थपे ।
वेस्ट इन्डिजका रोस्टन चेजले तीन विकेट लिए । अल्जारी जोसेफ र आन्द्रे रसेलका नाममा समान दुई विकेट रह्यो ।
त्यसअघि, वेस्ट इन्डिजका रोस्टन चेजले ४२ बलमा तीन चौका र दुई छक्कासहित ५२ रनको योगदान गरे । ओपनर काइल मयेर्सले ३५, आन्द्रे रसेलले १५ र अल्जारी जोसेफले ११ रन बनाए ।
दक्षिण अफ्रिकाका तबरेज शाम्सीले तीन विकेट लिए । मार्को जान्सेन, आइदेन मार्करम, केशव महारेज र कगिसो रबाडाले समान एक विकेट लिए ।
जितसँगै दक्षिण अफ्रिका सुपर–८ को समूह–२ बाट शीर्ष स्थानमा रहँदै सेमिफाइनलमा पुगेको हो । जारी प्रतियोगितामा अपराजित दक्षिण अफ्रिकाले सुपर–८ का तीन खेलबाट ६ अंक जोड्यो । समान खेलबाट दुई अंकको वेस्ट इन्डिजको भने विश्वकप यात्रा टुंगिएको छ । वेस्ट इन्डिजले सन् २०१२ र २०१६ मा ट्वान्टी–२० विश्वकपको उपाधि जितेको थियो ।