![नदी सफाइ गर्दै काठमाडौं महानगर](https://12khari.top/uploads/posts/bagmati-12-1713321580.jpg)
काठमाडौं । काठमाडौं महानगरपालिकाले यहाँका नदीहरूको सफाइ सुरु गरेको छ । वातावरण विभागअन्तर्गतका ५५ कर्मचारीको समूहले रुद्रमती (धोबीखोला), कपनको खहरे र बालाजु क्षेत्रबाट बग्ने भचाखुसी सफाइ गरिसकेको छ । सफाइ समूहले हाल इच्छुमती (टुकुचा) नदी सफाइ गरिरहेको छ ।
उक्त समूहले राजधानीको मध्यभागबाट बग्ने इच्छुमती सफाइमा एक हप्ता बिताइसकेको छ । अरू नदीमा भन्दा इच्छुमतीमा बढी फोहोर भेटिएको समूहका सुपरभाइजर सागर लुइँटेलले जानकारी दिए ।
रुद्रमतीमा महानगरपालिकाले यन्त्र लगाएर सफाइ गरिरहेको छ । महानगरपालिकाको समूहले सफाइ गरुन्जेल सफा देखिएको रुद्रमतीमा प्लास्टिकलगायत फोहोर थुप्रिन थालेको छ ।
सफाइ गरुन्जेल आकर्षक देखिएको नदी फेरि फोहर देखिन थालेको कपनका स्थानीय लक्ष्मण ढकाल बताउँछन् ।
महानगरपालिकाले यस क्षेत्रका अरू नदी पनि यसरी सफाइ गर्ने जनाइएको छ ।
महानगर क्षेत्रका नदीमा सिधै ढल र फोहोर फाल्नाले दुर्गन्धित बनेको छ । नदी किनारबाट हिँड्दा नाक थुन्नुपर्ने अवस्था छ ।
०७० जेठ ५ गतेदेखि वाग्मती सफाइ सुरु गरिए पनि नदी अपेक्षाकृत सफा हुन सकेको छैन । वाग्मती सफाइ महाअभियानले ५८० हप्ता पार गरे पनि नदीको अवस्थामा धेरै परिवर्तन आएको छैन । वाग्मतीसँगै उपत्यकाका सबै नदी र चक्रपथ सफाइ सुरु गरिए पनि अवस्था उस्तै छ ।
जनस्तरबाट सुरु महाअभियानलाई स्थानीय सरकारले साथ नदिएको गुनासो सुनिने गरेको छ । गुनासोबीच नै महानगरपालिकाले नदी सफाइ थालेको हो । रासस