काठमाडौं । उपप्रधान एवं गृहमन्त्री समेत रहेका राष्ट्रिय स्वतन्त्र पार्टी (रास्वपा)का सभापति रवि लामिछानेले आफूहरू उद्देश्यमा अडिग रहेको बताएका छन् । गन्तव्यमा स्पष्ट रहेको उनले उल्लेख गरेका छन् ।

रास्वपाको दोस्रो स्थापना दिवसका अवसरमा शुभकामना दिँदै उनले कैयौँ कठिनाइ चिर्दै आफूहरू अघि बढेको स्मरण गरेका छन् । “...बाटोमा त कहिले पहिरो जान्छ, कहिले ढुंगा खस्छ । आमनागरिक एवं रास्वपा परिवारका तमाम सदस्य, शुभचिन्तकहरूको आशा र अपेक्षासहितका अग्लाअग्ला पहाडहरू काँधमा बोकेर हामी अहिले भीरको बाटोमा सिस्नु समाउँदै हिँडिरहेका छौँ,” शुक्रबार सामाजिक सञ्जालमा उनले लेखेका छन् ।

वैचारिक स्पष्टतासँगै राजनीतिक परिपक्वता हासिल गर्दै आफूहरू अघि बढ्ने उनले बताएका छन् । विभिन्न परिस्थितिको सामना गरिसकेको उल्लेख गरेका छन् ।

“...हामी हाम्रो यात्रामा अविचलित छौँ । सम्झ्नुस् त, देश तथा विदेशका  टोलटोल, बस्तीबस्तीका आममान्छेको आवाज बोल्दाबोल्दै त्यो आवाजलाई ‘घण्टी’मा रूपान्तरण गरेर दुई वर्षमा हामी हल्ला नै नगरी सिंहदरबार पसिसक्यौँ,” उनले लेखेका छन् ।

उनले अगाडि लेखेका छन्, “२१ सांसदले एक वर्षमा सिंगो सदनको ध्यान तान्यौँ, चार मन्त्रीले सिंगो देशको ध्यान तान्दै छौँ ।”