काठमाडौं । शुक्रबारदेखि प्रदर्शनको तयारीमा रहेको चलचित्र ‘दान्भी’ले उत्साहजनक शो पाएको छ । बुधबारदेखि मल्टिप्लेक्सहरूले अग्रिम टिकट बुकिङ खुला गरेका छन् ।

देशकै ठूलो मल्टिप्लेक्स चेन क्यूएफएक्सले ‘दान्भी’लाई काठमाडौंमा १६ र बाहिर ३१ शो उपलब्ध गराएको छ । 

दोस्रो ठूलो मल्टिप्लेक्स आईएनआईले १२, वान सिनेमाजले ७ शो उपलब्ध गराएका छन् । एफक्युब, बीएसआर, बिग मुभीज रन्जनालगायत मल्टिप्लेक्समा पनि ‘दान्भी’ले उत्साहजनक शो पाएको छ । 

रूपेश तामाङको निर्देशनमा बनेको फिल्ममा अभिनेत्री पूजा शर्माले पहिलोपटक एक्सन भूमिका निर्वाह गरेकी छन् । चलचित्रमा पूजासँगै कुन्साङ बम्जन, किरण श्रेष्ठ, मोनालिसा खतिवडा, राजाराम पौडेल, कालु राणा, सीता तामाङलगायत कलाकारको पनि अभिनय छ । 

रि–रिलिज हुन लागेको ‘आचार्य’ले क्यूएफएक्सका आउटलेटमा काठमाडौंमा जम्मा दुई शो पाएको छ । काठमाडौं उपत्यका बाहिर क्यूएफएक्सले ३ शो दिएको छ । वान सिनेमाजले ३ शो दिएको छ । आईएनआईले पनि समान ३ शो दिएको छ । 

सत्यराज आचार्य मुख्य भूमिकामा रहेको चलचित्र यसअघि १३ वर्ष अगाडि रिलिज भएको थियो । 

गायक तथा संगीतकार भक्तराज आचार्यको बायोपिक मुभी ‘आचार्य’लाई प्रशान्त रसाइलीले निर्देशन गरेका छन् ।