काठमाडौं । आईसीसी ट्वान्टी–२० विश्वकपअन्तर्गत समूह चरणको अन्तिम खेलमा अफगानिस्तानविरुद्ध १०४ रनको सहज जित निकाल्दै वेस्ट इन्डिज समूह विजेताका रूपमा सुपर–८ मा प्रवेश गरेको छ ।

मंगलबार बिहान भएको खेलमा वेस्ट इन्डिजले प्रस्तुत गरेको २१९ रनको लक्ष्य पछ्याउने क्रममा अफगानिस्तान १६.२ ओभरमा सबै विकेट गुमाएर ११४ रनमा समेटियो ।

अफगानिस्तानका इब्राहिम जद्रानले सर्वाधिक ३८ रन बनाए । अज्मतुल्लाह ओमरजाईले २३, कप्तान राशिद खाने १८ र करिम जन्नतले १४ रन थपे । अरू ब्याटरले दोहोरो अंकमा रन बनाउन सकेनन् ।

अफगानिस्तानलाई सस्तैमा समेट्न वेस्ट इन्डिजका ओबेड म्याकोयले तीन विकेट लिए । अकेइल हुसैन र गुडाकेस मोतीले समान दुई विकेट र आन्द्रे रसेल र अल्जारी जोसेफले समान एक विकेट हात पारे ।

त्यसअघि, टस हारेर ब्याटिङमा उत्रिएको वेस्ट इन्डिजले निर्धारित २० ओभरमा पाँच विकेट गुमाएर २१८ रन बनाएको थियो । वेस्ट इन्डिजका निकोलस पुरनले ५३ बलमा सर्वाधिक ९८ रन बनाए । शतक बनाउन दुई रनले चुकेका पुरनले ६ चौका र आठ छक्का प्रहार गरे ।

जोन्सन चार्ल्सले ४३ रन थपे । कप्तान रोभमन पावेलले २६ र साई होपले २५ रन जोडे ।

अफगानिस्तानका गुलबद्दिन नैबले दुई विकेट लिए । अज्मतुल्लाह ओमरजाई र नविन उल–हकले समान एक विकेट लिए ।

जितसँगै वेस्ट इन्डिज समूह चरणमा अपराजित रह्यो । चार खेलबाट आठ अंक जोडेको वेस्ट इन्डिज समूह ‘सी’को शीर्ष स्थानमा रहँदै सुपर–८ मा पुगेको हो । अफगानिस्तान पनि सुपर८ मा छनोट भइसकेको छ । समूहको दोस्रो स्थानमा रहेको अफगानिस्तानले चार खेलबाट ६ अंक जोड्यो ।