काठमाडौं । लकी फर्गुसनको कीर्तिमानी बलिङप्रेरित न्युजिल्यान्डले आईसीसी ट्वान्टी–२० विश्वकपमा पपुवा न्युगिनी (पीएनजी)विरुद्ध सात विकेटको जितसहित प्रतियोगिताको अन्त्य गरेको छ ।

सोमबार राति टारोउबामा पीएनजीले प्रस्तुत गरेको ७९ रनको लक्ष्य न्युजिल्यान्डले १२.२ ओभरमा पूरा गर्‍यो । न्युजिल्यान्डको जितमा डेविड कोन्वेले ३५ रन बनाए । कप्तान केन विलियम्सनले १८ र डार्यल मिचेलले १९ रन थपे ।

पीएनजीका काबुअ मोरेअले दुई विकेट लिए । चार्ल्स एमिनीले एक विकेट हात पारे ।

त्यसअघि, फर्गुसन विश्वकपमा चार ओभर नै मेडन फ्याँक्ने पहिलो बलर बन्दा टस हारेर ब्याटिङमा उत्रिएको पीएनजी १९.४ ओभरमा सबै विकेट गुमाएर ७८ रनमा समेटिएको थियो ।

पीएनजीका चार्ल्स एमिनीले १७, नोर्मन भानुअले १४ र सेसे बाउले १२ रन बनाए । अरू ब्याटरले दोहोरो अंकमा रन बनाउन सकेनन् ।

पीएनजीलाई सस्तैमा समेट्न न्युजिल्यान्डका फर्गुसनले तीन विकेट लिए । चार ओभर बलिङ गरेका फर्गुसनले चारै ओभर मेडन फ्याँके । ट्वान्टी–२० विश्वकपमा चारै ओभर मेडन फ्याँक्ने फर्गुसन अहिलेसम्मकै एक मात्र बलर हुन् ।

यस्तै, ट्रेन्ट बोल्ट, टिम साउदी र इश सोधीले समान दुई विकेट लिए । मिचेल स्यान्टनरले एक विकेट हात पारे ।

जितका बाबजुद न्युजिल्यान्ड प्रतियोगिताबाट बाहिरिएको छ । समूह ‘सी’मा चार खेलबाट चार अंक जोड्दै न्युजिल्यान्डले प्रतियोगिताको अन्त्य गर्‍यो । जितविहीन पीएनजी भने तालिकाको पुछारमा रहँदै प्रतियोगिताबाट बाहिरिएको छ ।