काठमाडौं । प्रतिनिधिसभाका सांसद योगेन्द्र मण्डलले महिलामाथि अपमान गर्ने आफ्नो नियत नरहेको बताएका छन् । शुक्रबारको प्रतिनिधिसभा बैठकमा बजेटको मन्त्रालयगत छलफलका क्रममा बुधबार दिएको अभिव्यक्तिमाथि महिला सांसदले प्रश्न उठाएपछि उनले प्रस्टीकरण दिएका हुन् ।

“त्यो दिन हामी महिला र कानुन मन्त्रालयकै विषयमा कुरा गर्दैथ्यौँ । महिलाको अपमानका कुरा, महिलासँग जोडिएको कुरा कुनै पनि त्यो दिन मक्सद थिएन,” उनले भने, “कानुन र महिला दुईवटाको समन्वयबाट राम्रो कानुन बनोस् । जनताले दुःख नपाओस् भन्न मात्रै खोजेको हो । त्यसैकारण सुवर्ण रेखाको उदाहरण दिएको थिएँ ।”

उनले बुधबारको बैठकमा वैवाहिक बलात्कारको मुद्दाका विषयमा बोलेका थिए । “श्रीमान्‌माथि पनि महिलाले जबरजस्ती करणीको मुद्दा हाल्न पाउँछ । एकदम खुसी छु । महिलाको अधिकारको कुरा हो । श्रीमान् आफूलाई मन लागेको बेला, आफ्नो इच्छा पूरा गर्न के गर्ने?," उनले भनेका थिए । 

आफूले स्टन्टबाजीका लागि उक्त अभिव्यक्ति नदिएको उनको भनाइ छ । “डेढ वर्षअघि जुम्ला जिल्लाको अदालतमा सुवर्ण रेखाजस्तै भएको थियो । एकजना इमान्दार मानिसमाथि एकजना महिलाले आरोप लगाइन्, पछि छानबिनमा पुरुष निर्दोष सावित भयो । र, त्यो महिलालाई अढाइ वर्षको जेल सजाय तोकियो । म त्यत्तिकै बोल्दिनँ । स्टन्टबाजी गर्दिनँ,” उनले भने ।

मण्डलले आफू महिला अधिकारवादी भएको र नाम लेख्ने अभियान चलाएको स्मरण गरे । “म जहाँ जन्मेको छु । २५ वर्षअघि ९० प्रतिशत भन्दा बढी महिला निरक्षर छन् । मैले नाम लेख्ने अभियान चलाएँ, अहिले पनि त्यो अभियान चलिरहेको छ । दुई लाखभन्दा बढी  महिलाले नाम लेख्न जानेका छन्,” उनले भने ।

उनले आफूले बोलेको विषय आपत्तिजनक भए त्यहीदिन ढ्यापढ्याप किन नगरेको भनी प्रश्न सोधे ।

“मेरो नियत त्यो होइन, म महिलालाई सम्मान गर्छु । त्यो दिनको रेकर्डमा माननीयज्यूहरूलाई आपत्ति थियो भने ढ्यापढ्याप गर्न सक्नुहुन्थ्यो,” मण्डलले भने, “नियमावलीमा छ त । अहिले तीन दिन पछाडि पत्रिकामा आइसकेपछि...। यो पनि नगरौँ ।”

मण्डलले राष्ट्रियतालाई प्राथमिकतामा राखेर कानुनको कमिकमजोरीलाई सुधार्न आग्रहसमेत गरे ।