रोम । अमेरिकी राष्ट्रपति जो बाइडेनले बन्दुक, लागुऔषधसहितकाे आराेपमा आफ्नो छोरा हन्टर बाइडेनमाथि भएको सजाय माफ नगर्ने बताएका छन् । बाइडेनको छोरालाई अवैध रूपमा हतियार खरिद गर्ने र नशालु औषधिको प्रयोग गरेको विषयमा झुटो बोलेको बारेमा अदालतले हालै दोषी ठहर गरेको थियो ।

फेडरल अदालतले गएको साता हन्टरलाई दोषी ठहर गरेपछि पहिलोपटक बाइडेनले आफ्नो धारणा सार्वजनिक गरेका हुन् । उनले आफूले हन्टरप्रति गर्व गर्ने समेत बताएका छन् । उनी अहिले लागुऔषधको आदतबाट बाहिर आइसकेको जनाउँदै अब उनी शालीन र प्रतिभाशाली व्यक्ति भएको समेत जनाएका छन् । 

जी–७ सम्मेलनमा भाग लिनका लागि इटाली पुगेका बाइडेनसँग पत्रकारले के उनले हन्टरलाई सजाय कम गर्ने कदम उठाउनेछन् भन्ने प्रश्न सोधेका थिए । यसबारेमा उनले भने, “म यो मामिलालाई लिएर सन्तुष्ट छु कि म यसमा केही गर्न गइरहेको छैन । मैले भनेँ कि जुरीले जुन फैसला गर्‍यो,  त्यो मलाई मन्जुर छ । म यसमा कायम छु र म हन्टरलाई माफी गर्न गइरहेको छैन ।” 

हन्टर बाइडेनलाई अदालतले लागुऔषध, बन्दुकसहित तीन मामिलामा दोषी ठहराएको थियो । बाइडेनले आफ्ना छोरालाई दोषी ठहर गर्नुअघि आफूले अदालतको सजायलाई कमी नगर्ने बताएका थिए । त्यही कुरा उनले फेरि दोहोर्‍याएका छन् । 

अमेरिकामा राष्ट्रपतिलाई अदालतबाट दोषी साबित भएका व्यक्तिको सजाय माफ गर्न वा कम वा त्यसमा परिवर्तन गर्ने अधिकार हुन्छ । बीबीसी