काठमाडौं । सुनजस्तो देखिने पहेँलो धातुसहित काठमाडौंबाट चारजना पक्राउ परेका छन् । भन्सार छली अवैध रूपमा संकलन गरी ल्याएको करिब २५ ग्राम पहेँलो धातुको सिक्री एकथान र ६९ ग्राम ९९ मिलिग्राम पहेँलो धातुको काँचो डल्लोसहित दुईजनालाई गए राति प्रहरीले पक्राउ गरेको हो ।

पक्राउ पर्नेमा मोरङको केराबारी गाउँपालिका–९ का ३१ वर्षीय सरोज कोइराला र रौतहटको कटहरिया नगरपालिका–६ का २४ वर्षीय मोहम्मद इन्तेयाज आलम छन् । कोइराला कतार एयरको उडानमार्फत नेपाल आएका थिए । उनले भन्सार छली ल्याएको उक्त धातु आलमलाई दिने क्रममा त्रिभुवन अन्तर्राष्ट्रिय विमानस्थलको अन्तर्राष्ट्रिय आगमन पार्किङ एरियाबाट पक्राउ गरिएको प्रहरीले जनाएको छ ।

यस्तै, भन्सार छली अवैध रूपमा संकलन गरी ल्याएको करिब ५० ग्राम सुनजस्तो देखिने पहेँलो धातुको सिक्री एकथानसहित दुईजनालाई शनिबार दिउँसो प्रहरीले पक्राउ गरेको छ । पक्राउ पर्नेमा सप्तरीको सुरुंगा नगरपालिका–५ का २१ वर्षीय मोहमद अरमान र सप्तरीकै खडक नगरपालिका–६ का ३७ वर्षीय ज्याउदिन मियाँ छन् ।

ज्याउदिन कतार एयरको उडानमार्फत दोहाबाट नेपाल आएका थिए । उनले उक्त धातु अरमानलाई दिने क्रममा त्रिभुवन अन्तर्राष्ट्रिय विमानस्थलको अन्तर्राष्ट्रिय आगमन पार्किङ एरियाबाट पक्राउ गरिएको प्रहरीले जनाएको छ ।

आवश्यक कारबाहीका निम्ति उनीहरूलाई भन्सार कार्यालयमा बुझाइने प्रहरी प्रधान कार्यालयले जानकारी गराएको छ ।