काठमाडौं । प्रधानमन्त्री पुष्पकमल दाहाल ‘प्रचण्ड’ आइतबार (आज) दिउँसो १ बजे भारत जाँदै छन् । भारतीय प्रधानमन्त्री नरेन्द्र मोदीको तेस्रो कार्यकालका निम्ति हुने शपथग्रहण समारोहमा सहभागी हुन उनी नयाँ दिल्ली जान लागेका हुन् ।

प्रधानमन्त्री प्रचण्डका साथमा उनकी छोरी गंगा दाहाल, कानुन, न्याय तथा संसदीय मामिलामन्त्री पदम गिरी, परराष्ट्रसचिव सेवा लम्साल, परराष्ट्र मन्त्रालयका शिष्टाचार महापाल विष्णुप्रसाद गौतम र परराष्ट्रको दक्षिण एसिया महाशाखा प्रमुख भृगु ढुंगाना पनि दिल्ली जानेछन् ।

“भ्रमण छोटो अवधिको लागि भएकोले भ्रमण दल पनि सानो रहेको छ,” परराष्ट्र मन्त्रालयका प्रवक्ता अमृत राईले भने ।

मोदीले तेस्रो कार्यकालका निम्ति स्थानीय समयानुसार आइतबार साँझ दिल्लीस्थित राष्ट्रपति भवनमा विशेष समारोहबीच पद तथा गोपनीयताको शपथ लिँदै छन् । उक्त समारोहमा प्रधानमन्त्री प्रचण्ड सहभागी हुनेछन् । प्रधानमन्त्री प्रचण्डले त्यहीँ मोदीलाई नयाँ कार्यकालका निम्ति बधाई तथा शुभकामना दिनेछन् ।

शपथग्रहण समारोह सकिएपछि प्रधानमन्त्री प्रचण्ड र उनका भारतीय समकक्षी मोदीबीच संक्षिप्त भेटवार्ता हुने परराष्ट्रले जनाएको छ ।

मोदी यसअघि दुईपटक प्रधानमन्त्री हुँदा आयोजित शपथ समारोहमा पनि नेपालका प्रधानमन्त्रीलाई निमन्त्रणा गरिएको थियो । मोदी पहिलोपटक प्रधानमन्त्री हुँदा सन् २०१४ मा आयोजित शपथ समारोहमा तत्कालीन प्रधानमन्त्री सुशील कोइराला सहभागी भएका थिए ।

मोदी दोस्रोपटक प्रधानमन्त्री हुँदा २०१९ मा आयोजित शपथ समारोहमा तत्कालीन प्रधानमन्त्री केपी शर्मा ओली सहभागी भएका थिए ।

मोदी लगातार तेस्रोपटक भारतको प्रधानमन्त्री हुँदा आयोजित शपथ समारोहमा सहभागी हुन जाने प्रचण्ड नेपालको तेस्रो प्रधानमन्त्री बनेका छन् । प्रधानमन्त्री प्रचण्ड सोमबार (भोलि) बेलुका ६ बजे स्वदेश फर्कने तय छ ।