नयाँ दिल्ली । भारतका प्रधानमन्त्री नरेन्द्र मोदीको आज हुन गइरहेको तेस्रो कार्यकालको शपथग्रहण समारोहमा केही छिमेकी र दुई निकट मित्र राष्ट्रका उच्चस्तरीय प्रतिनिधि मण्डललाई निम्तो दिइएको छ । निम्तो स्वीकार्दै सबै देशबाट उच्चस्तरीय प्रतिनिधि मण्डल नयाँ दिल्ली जाने तय भइसकेको छ । 

यसरी निम्तो गरिएकाहरूमा नेपालका प्रधानमन्त्री पुष्पकमल दाहाल ‘प्रचण्ड’, श्रीलंकाका राष्ट्रपति रणील विक्रमसिंघे, माल्दिभ्सका राष्ट्रपति डा. मोहमद मुइज्यू , सेसेल्सका उपराष्ट्रपति अहमद अफिफ, बंगलादेशका प्रधानमन्त्री शेख हसिना, मोरिसका प्रधानमन्त्री प्रभिन्दकुमार जुगनाउथ र भुटानका प्रधानमन्त्री छिरिंग तोग्बे रहेका छन् । 

एनडीटीभीले दिएको तालिकाअनुसार बंगलादेशका प्रधानमन्त्री र सेसेल्सका उपराष्ट्रपति शनिबार नै नयाँ दिल्ली पुगिसकेका छन् । अन्यमा नेपालका प्रधानमन्त्री स्थानीय समयअनुसार दिउँसो २ बजेर ५० मिनेटमा, मोरिससका प्रधानमन्त्री बिहान ९ बजेर ५ मिनेटमा, माल्दिभ्सका राष्ट्रपति बिहान ९ बजेर ५ मिनेटमा, भुटानका प्रधानमन्त्री बिहान ११ बजेर ३० मिनेटमा, श्रीलंकाका राष्ट्रपति ११ बजेर ५० मिनेटमा नयाँ दिल्ली पुग्ने कार्यतालिका रहेको छ ।

नेपालका प्रधानमन्त्री सबैभन्दा पछि दिल्ली पुग्ने विदेशी अतिथि हुनेछन् । विदेशी अतिथि बस्ने होटेलहरू लीला, ताज, आइटीसी मौर्य, क्लारिड्ज र ओबरायमा सुरक्षा व्यवस्था कडा पारिएको जनाइएको छ ।

मुइज्यू को भारत सम्बन्ध 
माल्दिभ्सका राष्ट्रपति मुइज्यूको भारतसँगको सम्बन्ध निकै तनावपूर्ण जस्तो यसअघि रहेकोमा अहिले आएर केही सुधार भएको पाइएको छ । यसअघि उनलाई ‘प्रो– चाइना’को आरोप लाग्दै आएको थियो । उनले राष्ट्रपति भएपछि पहिलो राजकीय भ्रमण चीनको गरेका थिए ।

हालै मात्र उनले निर्वाचनमा गरेको बाचाअनुसार माल्दिभ्समा रहेका भारतीय सेनालाई फिर्ता गराएका थिए । राष्ट्रपतिको कार्यालयले मोदीको निम्तो स्वीकार गरेको शनिबार नै जनाएको थियो । राष्ट्रपतिलाई भारतका माल्दिभ्सस्थित उच्चयुक्त मुनु महावारका तर्फबाट निम्तो हस्तान्तरण गरिएको जनाइएको छ । भारत र माल्दिभ्सको बीचमा सम्बन्ध राम्रो नभए पनि पछिल्लो समयमा केही सुधार आएको संकेत विभिन्न घटनाक्रमले देखाएका छन् । त्यसको पछिल्लो कडी दिल्लीले त्यहाँका राष्ट्रपतिलाई निम्तो गर्नु र राष्ट्रपतिले त्यसलाई स्वीकार गर्नुले देखाएको छ । एजेन्सी