विराटनगर । एउटा प्रदेशको भाषा, साहित्य, कला र संस्कृति अर्कोसँग अन्तरघुलन गराउने उद्देश्यले नेपाली लेखक संघले प्रदेशसँग प्रदेश कार्यक्रम थालेको छ । प्रदेश परिक्रमाको पहिलो शृंखलामा गण्डकीका स्रष्टासँग कोसी प्रदेशका स्रष्टा कार्यक्रम सम्पन्न गरिएको छ ।

शनिबार विराटनगरमा आयोजित कार्यक्रममा गण्डकीका र कोसीका स्रष्टाले सिर्जनामार्फत भावना आदानप्रदान गरे । नेपाली लेखक संघका अध्यक्ष समेत रहेका वरिष्ठ कवि तीर्थ श्रेष्ठ गण्डकीका स्रष्टाको नेतृत्व गरेर विराटनगर आएका थिए ।

कार्यक्रममा प्राज्ञ विवश पोखरेलले कोसी प्रदेशको साहित्यिक इतिहासका बारेमा कार्यपत्र प्रस्तुत गरे । गण्डकी प्रदेशबाट आएका स्रष्टालाई संघका तर्फबाट सम्मान समेत गरिएको थियो ।

लेखक संघ कोसी प्रदेशले सातै प्रदेशका स्रष्टालाई बोलाएर यसरी नै क्रमैसँग कार्यक्रम आयोजना गर्ने महासचिव मीनकुमार नवोदितले जानकारी दिए ।