काठमाडौं । नेपाल बिमा प्राधिकरणले बिमा सूचना केन्द्र स्थापना गर्न छलफल थालेको छ । प्राधिकरणले बुधबार काठमाडौंमा सरोकारवालाहरूसँग बिमा सूचना केन्द्रसम्बन्धी छलफल एवम् अन्तर्क्रिया कार्यक्रम आयोजना गरिएको थियो । बिमा ऐन, २०७९ मा व्यवस्था भएबमोजिम बिमा सूचना केन्द्र स्थापनाका सन्दर्भमा अन्तर्क्रिया कार्यक्रम आयोजना गरेको हो ।

बिमा सूचना केन्द्रको सम्भावित स्वरुपका बारेमा सम्बन्धित मन्त्रालय, सरकारी निकाय, नेपालस्थित अन्तर्राष्ट्रिय निकाय, विश्वविद्यालय, बिमक, पेसागत बिमा अभिकर्ता संघ र नेपाल बिमा सर्भेयर संघबाट राय सुझावहरू लिने उद्देश्यले कार्यक्रम आयोजना गरिएको प्राधिकरणले जानकारी दिएको छ ।

कार्यक्रमलाई सम्बोधन गर्दै नेपाल बिमा प्राधिकरणका अध्यक्ष सूर्यप्रसाद सिलवालले बिमा सूचना केन्द्र स्थापनाका लागि प्रारम्भिक चरणको छलफल सुरू भएको र सुझाव संकलनलाई सघनताका साथ निरन्तररूपमा अगाडि बढाइने बताए ।

“नागरिकको जीवन, सम्पत्ति र राष्ट्रिय सम्पत्तिको सुरक्षण गर्न आवश्यक सूचना प्राप्त गर्ने किसिमले बिमा सूचना केन्द्र स्थापनाका लागि सुझावहरू संकलन गर्न सुरू गरिएको छ,” अध्यक्ष सिलवालले भने, “केन्द्रको स्थापनाबाट सरकारी निकाय, समग्र बिमा बजार र नागरिकलाई फाइदा पुग्नेछ ।”

प्राधिकरणको सञ्चालक समितिका सदस्य कपिलदेव ओलीले बिमा सूचना केन्द्रको स्थापनाबाट बिमासम्बन्धी सूचनालाई व्यवस्थित, सुरक्षित र पारदर्शी बनाउन सहयोग पुग्ने विश्वास व्यक्त गरेका छन् ।

प्राधिकरणका निर्देशक कमलप्रसाद रेग्मीले बिमा सूचना केन्द्रको स्थापनालाई सहयोग पुग्ने गरी अन्तर्राष्ट्रियस्तरको सफ्टवेयर कार्यान्वयनमा ल्याउनुपर्ने धारणा राखेका थिए ।