![गाउँका बंगुर सकियो, एकजनाको भागमा ३१ केजी मासु !](https://12khari.top/uploads/posts/gaun-aayeko-bato-1716020731-1717556276.jpg)
काठमाडौं । चलचित्र ‘गाउँ आएको बाटो’को छायांकन भोजपुर, संखुवासभा, धरानलगायत ठाउँमा गरिएको थियो । चलचित्रलाई नवीन सुब्बाले निर्देशन गरिरहेका थिए ।
काठमाडौं वा यस आसपासमा सिनेमाको छायांकन गरिँदा कतिपय कलाकार आफ्नो सुटिङ सेड्युलअनुसार समय मिलेमा सकेसम्म साँझ–बिहान घरकै खाना खान पुग्छन् । घरमै सुत्छन् । काठमाडौंबाट टाढा सुटिङ हुँदा यो सम्भव हुँदैन । सिनेमाको सेटमै बनाइएको खाना खानुपर्छ ।
‘गाउँ आएको बाटो’को छायांकन गाउँमा भएकाले सबै एक ठाउँमा बस्ने र खाना खानुपर्ने अवस्था थियो । त्यसैले सबैको भान्सा एउटै थियो । सँगै खाना खान्थे । ठूलो समूहमा खाना खाँदा रमाइलो पनि हुने नै भयो । छायांकनमा हरेक दिन कम्तीमा ४५ जना हुने गरेको निर्माता आमोद राई बताउँछन् ।
‘गाउँ आएको बाटो’को किचनमा प्रायः हरेक दिन मासु पाक्थ्यो । राई कम्युनिटीको लगानीमा निर्मित चलचित्र भएकाले सेटमा पनि उनीहरूको संख्या उल्लेख्य थियो । त्यसैले बंगुरको मासु पकाइन्थ्यो ।
“हामी ठूलो संख्यामा रहेको र हरेक दिन मासु पाक्ने भएकाले सुटिङको अन्तिमअन्तिसम्म पुग्दा त्यो गाउँमा बेच्ने बंगुर नै सकिएछन्,” निर्देशक नवीन बाह्रखरीसँग भन्छन्, “इन्ड क्ल्यापको दिन त छायांकन सकिएको खुसीमा प्रायः हरेक सेटमा केही न केही काट्ने चलन हुन्छ, हाम्रो सेटमा त्यो दिन गाउँमा बंगुर सकिएपछि खसी ढालियो ।”
भोजपुरको बालंखामा छायांकन थियो । त्यहाँ यो सिनेमाको युनिट ८० दिन बसेको निर्माता राई बताउँछन् । सिनेमेटोग्राफरले बीचमै छोडेपछि छायांकन लम्बिएको थियो ।
छायांकन सकिएको खुसीमा खसी त काटियो, तर राई–लिम्बूले प्रायः खसीको मासु खाँदैनन् । त्यसैले त्यो दिन अधिकांश मासु फालिएको नवीन सुनाउँछन् ।
“हामीले अलि बढी नै मासु खाएछौँ कि क्या हो भनेर पछि हिसाब गर्दा एकजनाको भागमा ३१ केजी मासु परेछ,” नवीन भन्छन् ।
परम्परागत जीवनशैलीले जीवन धान्न कठिन हुन थालेपछि के गर्ने भनेर मूल पात्रले लिने निर्णयमा निर्मित ‘गाउँ आएको बाटो’ यही जेठ २५ गते रिलिज हुँदै छ । बाबुआमा र छोरा विकाससँगै बदलिएको परिस्थितिमा नयाँ संसारमा कसरी घुलमिल हुन्छन् र सपना फेरिन्छ भन्ने कथा सिनेमाले भन्ने निर्माण पक्षको भनाइ छ ।
चलचित्रमा दयाहाङ राई, पशुपति राई र बालकलाकार प्रशन राई मुख्य भूमिकामा छन् ।
टोरोन्टो र बुसान फिल्म फेस्टिभलमा प्रशंसा बटुलेको ‘गाउँ आएको बाटो’को पटकथा निर्देशक नवीनले महेश राईसँगको सहकार्यमा लेखेका छन् । मेन्छ्याम फिक्चर्स र बाँसुरी फिल्मस्को संयुक्त ब्यानरमा बनाइएको सिनेमाका निर्माता अमोद राई र निर्देशक नवीन स्वयं हुन् ।