काठमाडौं । लोकसभा निर्वाचन २०२४ मा सत्तारुढ भारतीय जनता पार्टी (भाजपा)ले बहुमत नल्याउने भएपछि जनता दल (युनाइटेड)– जेडी (यू)ले ‘प्रेसर पोलिटिक्स’ सुरू गरेको छ । जेडी (यू)का नेताले नीतिश कुमारलाई भारतको प्रधानमन्त्री बनाउनको लागि लबिङ सुरू गरेका छन् । जेडी (यू)को लबिङसँगै भारतमा राजनीतिक सरगर्मी बढेको छ । 

भाजपा नेतृत्वको राष्ट्रिय जनतान्त्रिक गठबन्धन (एनडीए) मा जेडी (यू) रहे पनि भाजपा एक्लैले बहुमत नल्याउने भएपछि नयाँ चलखेल सुरू भएको हो ।

५४३ सिटको लागि भएको लोकसभा निर्वाचनमा बहुमतको पुर्‍याउन २७२ आवश्यक पर्छ । प्रारम्भिक मतगणनाअनुसार भाजपा एक्लैले २४० सिटको हाराहारीमा जित्ने देखिएको छ । एनडीयूले २९४ सिटको हाराहारीमा ल्याउने देखिन्छ । 

नीतीश कुमारको पार्टी जेडी (यू) एमएलसी खालिद अनवरले मंगलबार दिएको अभिव्यक्तिले एनडीयूमा फुट आउने संकेत गरेको छ । ‘अब भारतको प्रधानमन्त्री को होला ?’ भनि मिडियाले सोधेको प्रश्नमा खालिद अनवरले भने, “नीतिश कुमार ।” उनले यस्तो अभिव्यत्ति दिएपछि भारतीय राजनीति तातेको छ । 

उनले थप स्पष्ट पारे, “नीतिश कुमारभन्दा राम्रो प्रधानमन्त्री को हुन सक्छ ? नीतिश कुमार एक अनुभवी राजनेता हुन्, जसले समाज र देशलाई बुझेका छन् । उनले सबै लोकतान्त्रिक संस्थाको सम्मान गर्छन् । हामी अहिले एनडीए गठबन्धनको हिस्सा छौँ, तर पहिला पनि र अहिले पनि जनता नीतिश कुमार प्रधानमन्त्री बनुन् भन्ने चाहन्छन् । आजको परिणापछि यो आशा झन बढेको छ ।”