काठमाडौं । माछापुच्छ्रे बैंकले सामाजिक उत्तरदायित्वअन्तर्गत खानेपानी पूर्वाधार निर्माण गरी त्रिभुवन जन माध्यामिक विद्यालयलाई हस्तान्तरण गरेको छ । बैंकले सुर्खेतको शारदा नगरपालिका–१५, माल्नेटामा रहेको सो विद्यालयमा खानेपानी पूर्वाधार निर्माण गरेको हो । 

उक्त पूर्वाधार बुधबार विद्यालयमा आयोजित एक औपचारिक समारोहकाबीच हस्तान्तरण गरिएको छ । विद्यालय सञ्चालनका लागि अति आवश्यक पर्ने खानेपानीको अभावका कारण पठनपाठनमा समेत समस्या परेपछि बैंकले उक्त  विद्यालयको अवस्था अवलोकन गरी उक्त पूर्वाधार निर्माण गरेको हो ।

२८९ विद्यार्थी र १८ शिक्षक÷कर्मचारी कार्यरत सो विद्यालयले ३५ सय मिटर टाढा रहेको मुहानबाट अस्थायी रूपमा पानीको पाइप जडान गरी खानेपानीको व्यवस्था गर्दै आएका थिए । खडेरीको समयमा पानी सुक्ने, डढेलो लागेको बेलामा पानीको पाइप जलेर आपूर्ति बन्द हुने लगायतका समस्या रहेको थियो ।

उक्त समस्यालाई मध्यनजर गर्दै बैंकले स्थायी रूपमा खानेपानी आपूर्तिका लागि मुहानमा ट्यांकी निर्माण गर्नुका साथै विद्यालय परिसरमा धारा निर्माण गरेको हो । बैंकले झन्डै दुई महिनाको समय लगाएर उक्त पूर्णधारहरू निर्माण गरेको थियो ।

बैंकले आफ्नो संस्थागत सामाजिक उत्तरदायित्वअन्तर्गत देशका विभिन्न स्थानहरूमा विभिन्न संघसंस्थाहरूसँग मिलेर स्वास्थ्य, शिक्षा, पूर्वाधार निर्माण, वित्तीय साक्षरता, दिगो विकास लगायतका क्षेत्रहरूमा काम गर्दै आएको छ ।