काठमाडौं । बार्सिलोना तथा म्यानचेस्टर युनाइटेडका पूर्वरक्षक जेरार्ड पिकेमाथि स्पेनको अदालतले भ्रष्टचारको विषयमा छानबिन गर्न आदेश दिएको छ । स्पेनिस सुपर कप साउदी अरेबियामा लग्ने सहमतिमा संलग्न देखिएको पिकेमाथि भ्रष्टाचारको आंशकासहित अदालतले छानबिनको आदेश दिएको हो ।

पिकेको कम्पनी कोस्मोसले स्पेनिस फुटबल फेडेरेसनसँग ‘ब्रोकर’ को भूमिका निभाउँदै कम्पनीले ४० मिलियन युरो पाउने सम्झौता गरेको थियो । जसमा फेडेरेसनले ४०० मिलियन युरो पाउने उल्लेख छ ।

अदातलका न्यायाधिस डेलिया रोड्रिगोले यस सम्झौतामा ‘सम्भावित गैरकानुनी र अपराधिक कार्य देखिएको’ बताएका हुन् । यसै विषयमा छानबिन हुने समूहमा पिके पनि समेटिएको अन्तर्राष्ट्रिय सञ्चारमाध्यमले खुलाएका छन् ।

तर, पिकेले भने सम्झौता कानुनविपरीत भएको कुरा खण्डन गर्दै आएका छन् । सुपर कप सन् २०२० मा साउदी अरेबिया सारिएको थियो । यसपछि पनि २०२२ मा साउदीमै सुपर कप भएको थियो ।