![बजेटलाई पत्याएन सेयर बजारले, यो साता सबै सूचक ओरालो लागे](https://12khari.top/uploads/posts/Share-Nepse-Bear-1712136712.jpg)
काठमाडौं । आगामी आर्थिक वर्षको बजेट भाषण पछिका दुई कारोबार दिन सेयर बजार लगातार उच्च अंकले घटेर बन्द भयो । बजेट आउनुभन्दा अगाडिको साता ११२ अंक बढेको बजार बजेट आउने साताको पहिलो दिन आइतबार २२ अंक र बजेट भाषण भएपछिका दुई कारोबार दिन बुधबार र बिहीबार बजार ४३.७० अंक घट्यो ।
नेपाल स्टक एक्सचेन्ज (नेप्से)का अनुसार यो साताको बुधबार बजार २३.८१ अंक र बिहीबार १९.८९ अंकले घटेको हो । प्रतिशतमा भन्दा दुई दिनमा बजार २.०७ प्रतिशतले बजार ओरालो लागेको छ ।
सेयर बजारमा लगानी गर्नेप्रति लक्षित बुँदा नभएकाले पनि लगानीकर्ता नेपाल राष्ट्र बैंकले जारी गर्ने मौद्रिक नीतितर्फ केन्द्रित भएका छन् । राष्ट्र बैंकले आगामी साउनमा ल्याउने मौद्रिक नीतिले मात्र बजारलाई राहत दिन सक्ने लगानीकर्ताहरूको बुझाइ छ । त्यही भएर पनि अहिले बजेट अगाडिको प्रोफिट बुक गर्नतर्फ लगानीकर्ता लागेको देखिन्छ । ‘सर्ट टम प्रोफिट बुकिङ र स्टोप लस’ले नै बजारले गति लिन नसकेको लगानीकर्ता शिवचन्द्र सामाजिक सञ्चालमा लेख्छन् ।
यो साता समग्रमा बजार ६१.९५ अंकले घटेको छ । कारोबार रकम चार अर्ब ८७ करोड १४ लाख रुपैयाँले घटेको छ । यो साताको चार कारोबार दिनम १७ अर्ब १२ करोड ७८ लाख रुपैयाँको सेयर कारोबार भएको छ । गत साता करिब २२ अर्बको सेयर कारोबार भएको थियो ।
यो साताको सोमबार बजार ३.८९ अंकले बढेको थियो भने तीन कारोबार दिन बजार घटेको छ । यो साताको आइतबार २२.१४ अंकले बजार घटेको थियो । सोमबार बजार झिनो अंकले बढ्यो भने मंगलबार बजार गणतन्त्र दिवसका कारण बजार बन्द भयो । त्यही दिन सरकारले आगामी आर्थिक वर्ष २०८१/८२ का लागि १८ खर्ब ६० अर्ब ३० करोड रुपैयाँको बजेट प्रस्तुत गरेको छ । बजेट प्रस्तुत गरेको भोलिपल्ट बुधबार बजार २३.८१ अंक र बिहीबार १९.८९ अंकले बजार घटेको छ ।
गत सताको चार कारोबार दिन नै बजार बढेको थियो । गत साताको आइतबार बजार ४५.६९ अंक, सोमबार २७.५४ अंक, मंगलबार २३.९४ अंक र बुधबार बजार १५.५४ अंकले बढेको थियो ।
गत साताको तुलनामा कुल बजारपुँजीकरण करिब एक खर्बले घटेको छ । यो साताको अन्तिम करोबार दिन कुल बजार पुँजीकरण ३२ खर्ब ८१ अर्ब ६६ करोड रुपैयाँ कायम भएको छ । गत साताको अन्तिम कारोबार दिन कुल बजार पुँजीकरण ३३ खर्ब ७९ अर्ब ९१ करोड रुपैयाँ कायम भएको थियो । एक सातामा कुल बजार पुँजीकरण ९८ अर्ब २४ करोड रुपैयाँले घटेको हो ।
साताको अन्तिम कारोबार दिन बिहीबार बजार २०६९.५३ विन्दुमा पुगेर बन्द भएको छ । यो दिन चार अर्ब २१ करोड ७४ लाख रुपैयाँको सेयर कारोबार भएको छ । यो दिन अधिकांश कम्पनीको सेयर मूल्य घटेको छ । गत साता वाणिज्य बैंक समूहको परिसूचक बढ्दा बजारमा सकारात्मक लय देखिएको थियो । तर, यो साता लगानीकर्ता वाणिज्य बैंक समूहका कम्पनीबाट पनि प्रोफिट बुक गर्नतर्फ लागेको देखिन्छ ।
एक सातामा नै वाणिज्य बैंक समूहको ७३.४८ अंकले घटेको छ । बिहीबार यो समूहको परिसूचक १११९.२५ विन्दुमा बन्द भएको छ । गत साताको अन्तिम कारोबार दिन यो समूहको परिसूचक ११९२.२५ विन्दुमा बन्द भएको थियो ।