काठमाडौं । स्पेनिस क्लब बार्सिलोनाले जर्मनीका हेन्सी फ्लिकलाई क्लबको नयाँ प्रशिक्षकमा अनुबन्ध गरेको छ ।

क्लबले बुधबार फ्लिकलाई नयाँ प्रशिक्षकको रूपमा सार्वजनिक गरेको हो । यसअघिका मुख्य प्रशिक्षक जाभी हर्नान्डेजसँगको सम्झौता रद्द गरेपछि बार्सिलोनाले रिक्त पदमा फ्लिक ल्याउने प्रक्रिया थालेको थियो ।

सन् २०२१ मा बार्सिलोनाको प्रशिक्षकमा नियुक्त भएका जाभीको कार्यकालमा बार्सिलोनाले एक ला लिगा र एक सुपर कपको उपाधि जितेको थियो । गत सिजन ला लिगाको उपाधि जिते पनि यस सिजन स्वाभाविक लय गुमाएपछि बार्सिलोनाले जाभीसँगको सम्झौता तोडेको हो ।

नयाँ प्रशिक्षक फ्लिक यसअघि सन् २०२१ देखि २०२३ सम्म जर्मनीको प्रशिक्षण सम्हालेका थिए । त्यसअघि उनी दुई वर्ष जर्मन क्लब बायर्न म्युनिखको जिम्मेवारीमा थिए । सन् २०२० मा च्याम्पियन्स लिगको क्वार्टरफाइनलमा बार्सिलोनाले बायर्न म्युनिखसँग ८–२ को हार बेहोर्दा फ्लि नै जर्मन क्लबको मुख्य प्रशिक्षक थिए ।

बार्सिलोनाले हालसम्म फ्लिकसँगको सम्झौता रकम र समयावधि भने सार्वजनिक गरेको छैन ।