काठमाडौं । गीतकार कल्याण श्रेष्ठको नयाँ गीतिएल्बम सार्वजनिक भएको छ । शुक्रबार काठमाडौंमा कार्यक्रम आयोजना गर्दै श्रेष्ठले ‘नबुझिएको जिन्दगी’ नामक गीतिएल्बम सार्वजनिक गरेका हुन् । 

पूर्वप्रधानन्यायाधीश समेत रहेका गीतकार श्रेष्ठको एल्बममा पाँचवटा गीत समावेश छन् । ‘जिन्दगी’ बोलको गीतमा महेश खड्काको संगीत र विनोद राईको स्वर छ । राज सिक्देलको स्वर रहेको ‘तिमीसँग’बोलको गीतमा सुनील मास्केको संगीत छ ।
 
‘एक झलक’ बोलको गीतमा रवि ओडको स्वर तथा महेश खड्काको संगीत छ । ‘कहिले आँखाले’ बोलको गीतमा रुपक चौधरीको स्वर छ भने संगीत सुदेश शर्माले भरेका छन् । ‘मेरो भगवान’ बोलको गीतमा संगीता शाक्य थापाको स्वर र सुदेश शर्माको संगीत सुन्न सकिन्छ । 

एल्बममा ‘जिन्दगी’ र ‘तिमीसँग’को म्युजिक ट्रयाक पनि समावेश छ ।