![स्वास्थ्यमन्त्री यादवले गरे वीर अस्पतालको छड्के अनुगमन](https://12khari.top/uploads/posts/Pradeep-Yadv-1716375238.jpg)
काठमाडौं । स्वास्थ्य तथा जनसंख्यामन्त्री प्रदीप यादवले वीर अस्पतालमा छड्के अनुगमन गरेका छन् । आज दिउँसो मन्त्रीसहित सचिव रोशन पोखरेलसहितका कर्मचारी अनुगमनमा पुगेका हुन् ।
मन्त्री यादवले वीर अस्पतालको नयाँ भवनदेखि पुरानो भवनको अवलोकन गरे । त्यसपछि उनी नजिकै रहेको राष्ट्रिय ट्रमा सेन्टरको समेत अवस्था बुझ्न पुगेका थिए ।
करिब तीन घण्टाको अनुगमनमा मन्त्री यादवले प्रत्यक्षरूपमा बिरामीलाई भेटेर अवस्थाका बारेमा जानकारी लिएका थिए ।
अनुगमनका क्रममा उनले अस्पतालको आकस्मिक कक्ष र ओपीडीमा सबैभन्दा बढी समस्या देखापरेको बताए ।
“देशभरकै बिरामीको उपचारको केन्द्र रहेको अस्पताल व्यवस्थित हुुनुपर्छ,” उनले भने, “कतिपय कक्ष तथा सेवा व्यवस्थित नहुँदा बिरामीले दुःख पाउनुभएको छ । मुख्यतया जनशक्तिको अभाव देखिएको छ, यसले व्यवस्थापनमा समस्या देखिएको हो ।”
मन्त्री यादवले अस्पतालको सेवा थप प्रभावकारी बनाउन जनशक्तिको व्यवस्थापन तुरुन्तै गरिने पनि बताए ।
अनुगमनका क्रममा शय्या अभावका कारण एउटै शय्यामा महिला र पुरुष राखेर उपचार गरेकोसमेत भेटिएको थियो ।
अस्पतालको औषधि पसलमा घन्टौँ लाइन लागेका सर्वसाधाणसँग मन्त्री यादवले सोधपुछ गरेका थिए । सर्वसाधारणले औषधि पसलमा टोकन सिस्टम नहुँदा घण्टौँ लाइनमा बस्नुपर्ने बाध्यता रहेको सुनाएका थिए ।
मन्त्री यादवले औषधि पसलको लाइन व्यवस्थापन गर्न तुरुन्तै टोकन सिस्टम ल्याउन अस्पतालका निर्देशक डा. भूपेन्द्र बस्नेतलाई निर्देशन दिए । त्यस्तै, सर्वसाधारणले स्वास्थ्य बिमामार्फत औषधि नपाएको गुनासो गरेका थिए ।
डा. बस्नेतले अनुगमनकै क्रममा सर्वसाधारणमाँझ औषधि अभाव भएको स्वीकार गर्दै औषधि ल्याउने प्रक्रियामा रहेको र दुई साताभित्र स्वास्थ्य बिमाको औषधि आइपुग्ने जानकारी दिए ।
“औषधिको अभाव छ, हामी स्वीकार गर्छौं,” उनले भने, “दुई साताभित्र औषधि अभाव पूर्ति गरेसँगै बिमासम्बन्धी हेर्ने छुट्टै डेस्कको व्यवस्थापन समेत मिलाउने छौँ ।” रासस