काठमाडौं । प्रमुख प्रतिपक्षी दल नेपाली कांग्रेसले सभामुख देवराज घिमिरेलाई संसद् ब्यारेक होइन बहसकै थलो हो भनेर स्वीकार गरेको भन्दै व्यंग्य गरेको छ । नेपाली कांग्रेसका सहमहामन्त्रीसमेत रहेका सांसद बद्री पाण्डेले सभामुख घिमिरेले लगातार प्रतिपक्षलाई बोेल्न रोकेर मार्सलको भरमा संसद् चलाएको विषयमा यस्तो व्यंग्य गरेका हुन् । 

“सदनलाई ब्यारेकबाट बहसको थलो बन्ने अवसर दिनु भएकोमा सभामुखलाई धन्यवाद,” सांसद पाण्डेले भने । उनले संसदीय समितिको टीओआरमा सहमति नभएको भन्दै अहिले पनि टार्ने प्रयास मात्र भएकाले आफूहरूले संसद् सञ्चालन गर्न नदिने जानकारी गराएका थिए ।  

“सहकारी बचतकर्ताको बचत रकम अपचलनमा गृहमन्त्रीमाथि संसदीय छानबिन समितिमा छलफल भएको भए पनि टीओआरमा कुरा नमिलेको जानकरी पाएका छौँ,” पाण्डेले भने, “हामी हामो अडानमा कायम छौँ ।”

उनले चारवटा सहकारीको ऋण गोरखा मिडियाले लिएको र त्यसरी ऋण लिँदा गृहमन्त्री लामिछाने ग्यालेक्सी टेलिभिजनको प्रवन्ध निर्देशकसहित १५ प्रतिशतको सेयर होल्डर रहेको तथ्यहरूले प्रमाणित गरेको उनले बताए । 

यस्तै अवस्थामा राप्रपाकी सांसदविरुद्ध पक्राउ पूर्जी जारी भएको भन्दै उनले गृहमन्त्रीलाई विशेष छुट दिनुपर्ने कारण सभामुखसँग प्रश्न गरेका थिए ।