काठमाडौं । मध्यरातमा अचानक लेदोसहित आएको बाढी बुटवलका विद्यालय, उद्योग र दर्जनौँ घरमा पसेको छ । रुपन्देहीको बुटवलमा शनिबार मध्यरातदेखि अविरल वर्षा भएको थियो । लामो समयपछिको वर्षाले किसानलाई भने केही राहत भएको छ ।

मध्यरातमा ज्योतिनगर हुँदै लेदोसहितको बाढी नाली र नहरबाट बस्ती, विद्यालय र उद्योगमा पसेको हो । बुटवलका व्यस्त बजार क्षेत्र अमरपथ, विकासपथ, हाटबजारलाइनलगायत सडकमा हिलो र पातपतिंगर भरिएपछि डोजर लगाएर सफा गरिएको छ ।

यस्तै, बुटवल उपमहानगरपालिकाको कार्यालय, पश्चिम नेपाल बस व्यवसायी समितिको प्रधान कार्यालय, रुपन्देही उद्योग संघको कार्यालय, राष्ट्रिय समाचार समिति (रासस)को कार्यालयका फर्निचर, कागजात र लत्ताकपडामा क्षति भएको छ ।

बुटवलका दर्जनौँ पसलमा बाढी पसेर लाखौँ रुपैयाँबराबरको क्षति भएको व्यापारीले बताएका छन् । नाला साँघुरिँदै जाँदा बाढी बस्तीमा पसेको स्थानीय व्यापारीको भनाइ छ ।

उपमहानगरपालिकाको दमकलमा पानी ल्याएर डोजरको सहायतामा फोहोर सरसफाइ गरिएको बुुटवल उपमहानगरका प्रमुख खेलराज पाण्डेयले जानकारी दिए ।

यो क्षेत्रमा डुबान हुने गरे पनि अहिलेजस्तो हिलो कहिल्यै नभएको बुटवल–५ का वडाध्यक्ष हरि श्रेष्ठले बताए । हिमालयन टेली भ्वाइस