नयाँ दिल्ली । भारतसँग तनावपूर्ण सम्बन्ध रहेको माल्दिभ्सका विदेशमन्त्री मूसा जमिर आज भारत भ्रमणमा आउन लागेका छन् । 

माल्दिभ्सबाट भारतीय सैनिक फिर्ताको डेडलाइनभन्दा एक दिन पहिला विदेशमन्त्री जमिरको भ्रमणलाई धेरैतिरबाट चासोका साथ हेरिएको पाइएको छ ।

यसअघि माल्दिभ्सका पर्यटनमन्त्री इब्राहिम फैसलले भारतीय पर्यटकलाई माल्दिभ्स आउनका लागि अपिल गरेका थिए । उनले भारत र माल्दिभ्सको सम्बन्धको इतिहास रहेको जनाउँदै भारतले पहिले पनि माल्दिभ्सलाई मदत गरेको र फेरि एक पटक दुवै देश मिलेर काम गर्नुपर्ने जनाएका छन् ।

यसै वर्ष भारतका प्रधानमन्त्री नरेन्द्र मोदीको लक्ष्यदीपको भ्रमणका क्रममा माल्दिभ्सका केही अधिकारीहरूले आपत्तिजनक टिप्पणी गरेको आरोपमा भारतीय पर्यटकले ‘माल्दिभ्स बायकट्’को अभियान चलाएका थिए । त्यसपछि माल्दिभ्स जाने भारतीय पर्यटकको संख्या घटेको थियो । 

सन् २०२३ मा माल्दिभ्स जाने भारतीय पर्यटक रुसपछि दोस्रो स्थानमा रहेका थिए । तर, विवादका कारण जनवरी २०२४ मा भारतीय पर्यटक संख्या घटेर पाँचौँ स्थानमा पुगेको थियो । माल्दिभ्सको जीडीपीमा पर्यटनको हिस्सेदारी ३० प्रतिशत रहेको छ । साथै, त्यहाँ ६० प्रतिशत विदेशी मुद्रा पर्यटन उद्योगबाट नै आइरहेको छ । त्यसैले माल्दिभ्सका विदेशमन्त्रीको पछिल्लो भ्रमण भारतसँगको सम्बन्ध सुधारका लागि भएको  अनुमान गरिएको छ । बीबीसी