लन्डन । बेलायतको राजधानी लन्डनको मेयर पदमा तेस्रोपटक विपक्षी लेबर पार्टीका सादिक खानले विजय हासिल गरेका  छन् । उनलाई कुल खसेको मतमा ४३ प्रतिशतभन्दा बढी मत प्राप्त भएको थियो ।

खानले  सत्तारुढ  कन्जरभेटिव पार्टीका उमेदवार सुसैन हललाई दुई लाख ७६ हजार मतले पछाडि पारेका थिए ।   तीन वर्षअघि भएको चुनावमा भन्दा यसपालि खानले ७ प्रतिशत बढी मत पाएका छन् ।

विजयी भएपछि खानले प्रतिक्रिया दिँदै भने, “मैले माया गर्ने सहरको सेवा गर्न पाउनु मेरो जीवनकै सम्मान हो ।”

लन्डनको चुनावले निकट भविश्यमा हुने संसदीय निर्वाचनको पनि संकेत गरेको मानिएको छ । लन्डन मेयरको पद फेरि पनि विपक्षी पार्टीमै गएपछि प्रधानमन्त्री ऋषि सुनकलाई थप दबाब परेको छ ।

खान पहिलोपटक सन २०१६मा लन्डनको मेयर पदमा निर्वाचित भएका थिए । सुन्नी मुस्लिम समुुदायका ५३ वर्षीय खान लन्डनमै जन्मिएको भए पनि उनका हजुरबुबा भने भारतको लखनउका हुन् । प्रधानमन्त्री सुनक र मेयर खान दुवै भारतीय मुलका हुन् । बीबीसी