जमुनाहा नाका आजदेखि दुई दिन बन्द

देश

जमुनाहा नाका आजदेखि दुई दिन बन्द

शनिबार, जेठ ५, २०८१

जमुनाहा नाका आजदेखि दुई दिन बन्द — फाइल तस्बिर ।

नेपालगन्ज । बाँकेको नेपाल–भारत जमुनाहा नाका आज (शनिबार)देखि दुई दिनका निम्ति बन्द गरिने भएको छ ।

भारतको उत्तर प्रदेश राज्यको बहराइच जिल्लामा हुन लागेको लोकसभा निर्वाचनका निम्ति सीमानाका आज राति साढे १० बजेदेखि सोमबार बेलुका ५ बजेसम्म दुई दिन बन्द गर्न लागिएको जिल्ला प्रशासन कार्यालय बाँकेले जनाएको छ । भारतमा सोमबार निर्वाचन हुँदै छ ।

खुला सीमाका कारण निर्वाचनका बेला सुरक्षा चुनौतीलाई मध्यनजर गरी भारतीय सुरक्षा निकायबाट पत्राचार भएअनुसार सीमानाका बन्द गर्न लागिएको बाँकेका निमित्त प्रमुख जिल्ला अधिकारी जोरासिंह माझीले जानकारी दिए । नेपाल र भारत दुवै देशमा विभिन्न तहका निर्वाचन हुने समयमा विगतमा पनि सीमानाका बन्द गरिँदै आएको थियो ।

यसअघि, गएको साता पनि भारतको बहराइच जिल्लाको बहराइचमा निर्वाचन भएकाले ७२ घण्टाका निम्ति जमुनाहा नाका बन्द गरिएको थियो । रासस