काठमाडौं । वेस्ट इन्डिज ‘ए’सँगको पाँचौँ खेलमा नेपालका आसिफ शेख अर्धशतक बनाएर आउट भएका छन् । कीर्तिपुरस्थित त्रिवि क्रिकेट मैदानमा वेस्ट इन्डिजले प्रस्तुत गरेको १७३ रनको लक्ष्य पछ्याइरहेको नेपालबाट आसिफले ३२ बलमा अर्धशतक बनाएका थिए ।

अर्धशतक बनाउने क्रममा उनले दुई चौका र पाँच छक्का प्रहार गरे । त्यसपछि भने तीन बल खेल्दा उनले एक रन मात्र थप्न सके ।

जारी खेलको १४ ओभर सकिँदा नेपालले दुई विकेट गुमाएर ११२ रन बनाएको छ ।

यसअघि, टस जितेर ब्याटिङमा उत्रिएको वेस्ट इन्डिजले निर्धारित २० ओभरमा सात विकेट गुमाएर १७२ रन बनाएको थियो ।

शृंखलाका यसअघि चारमध्ये तीन खेलमा जित निकाल्दै वेस्ट इन्डिज प्रतियोगिताको च्याम्पियन बनिसकेको छ । पहिलो खेलमा नेपाल चार विकेटले विजयी भएको थियो । त्यसपछि वेस्ट इन्डिजले १०, ७६ र २८ रनको जित निकालेको थियो ।