इश्लामावाद । इरानका राष्ट्रपति इब्राहिम रइसी पाकिस्तानको तीन दिने भ्रमण पूरा गरी श्रीलंका तर्फ प्रस्थान गरेका छन् । २२ अप्रिलबाट सुरु भएको उनको पाकिस्तान भ्रमणको क्रममा रइसी इश्लामावाद, कराची र लाहोर गएका थिए ।
उनले भ्रमणका क्रममा दुई देशको सम्बन्धलाई विश्वको कुनै पनि शक्तिले नोक्सान गर्न नसक्ने बताएका थिए । दुई देशबीच यसक्रममा व्यापारसँग सम्बन्धित कतिपय विषयमा पनि सहमति भएको छ ।
यस भ्रमणलाई लिएर पाकिस्तानलाई अमेरिकाले इरानसँग व्यापारिक सम्बन्ध अघि बढाउनु अघि इरानलाई लगाइएको प्रतिबन्ध याद गर्न पनि सचेत गराएको थियो । पाकिस्तानमा गएको फेब्रुवरी महिनामा चुनाव भएपछि कुनैपनि विदेशी नेताको तर्फबाट गरिएको यो पहिलो भ्रमण थियो ।
इरानी राष्ट्रपतिले पाकिस्तान भ्रमणका क्रममा दुई देशबीच आगामी ५ वर्ष सम्म व्यापारिक सम्बन्ध १० अर्ब डलर सम्म पुर्याउने बताएका थिए । इरान र पाकिस्तानबीच २०२२मा व्यापार १ दशमलब ५ अर्ब डलरको रहेको थियो ।
जुन अघिल्लो वर्षभन्दा ३८ प्रतिशत बढी हो । इरानी राष्ट्रपतिले पाकिस्तानका सबैजसो उच्च अधिकारीसँग भेट्नुका साथै दुई देशबीच व्यापार, विज्ञान, कृषि, स्वास्थ्य, संस्कृति तथा कानुनी मामिला समेत गरी ८ विषयमा सहयोग आदान प्रदान सम्बन्धी संझौता भएको छ ।
इरानी राष्ट्रपतिको पाकिस्तान भ्रमणका सन्दर्भमा अमेरिका भने असन्तुष्ट देखिएको छ । पाकिस्तानको बलेस्टिक मिसाइल कार्यक्रमको सप्लायर्सलाई प्रतिबन्ध लगाउने कुरामा अमेरिकाले मंगलबार जोड दिएको थियो ।
अमेरिकी विदेश मन्त्रालयका उपप्रवक्ता वेदान्त पटेलले भने, “हामी ठूलो परिमाणमा बिनाशकारी हतियार खरिदसँग जोडिएको गतिविधिको खिलाफमा कारवाही जारी राख्नेछौं । त्यो चाहे जहाँसुकै होस ।”
उनले इरानसँग व्यापारिक सौदा गर्ने जुनसुकै देशलाई प्रतिबन्धको सम्भावित जोखिमका बारेमा सतर्क रहन सल्लाह दिइने बताए । बीबीसीबाट
