मस्को । रसियाका एक उच्च रक्षा अधिकारी घुस खाएको अभियोगमा कारागार चलान भएका छन् । रक्षा उपमन्त्री टिमुर इभानोभलाई अदालतले सो अभियोगमा जेल पठाइएको हो । 

इभानोभले भने घुस खाएको अस्वीकार गरेका छन् । उनलाई ठूलो परिमाणमा घुस खाएको अभियोग लगाइएको छ । उनी सन २०१६ मा रक्षा मन्त्रालयमा नियुक्त भएका थिए । ४७ वर्षीय इभानोभ रसियाको सैनिक पूर्वाधार परियोजनाका जिम्मेवार व्यक्ति मानिन्थे । 

उनका गतिविधिमाथि भ्रष्टाचार भएको भनेर रसियामा भ्रष्टाचार विरोधीले आलोचना गरिरहेका थिए । २०२२ मा रुसले युक्रेनमा आक्रमण सुरू गरेपछि यसखालको ठूलो भ्रष्टाचार प्रकरण रसियामा पहिलोपटक सार्वजनिक भएको हो । उपमन्त्री इभानोभ रुसी रक्षामन्त्री सर्जेइ शोइगुका सहयोगीका रूपमा कार्यरत थिए । उनी यसअघि मस्को क्षेत्रका उपप्रधानमन्त्रीका रूपमा समेत काम गरिसकेका व्यक्ति हुन् । जहाँ रक्षामन्त्री शोइगु त्यतिबेला गभर्नरको रूपमा काम गरेका थिए । 

सन् २०२२ मा एन्टी करप्सन फाउण्डेसन जो तत्कालीन विपक्षी नेता अलेक्सेइ नाभाल्नीले बनाएका थिए । सो संगठनले इभानोभ भ्रष्टाचारमा संलग्न भएको आरोप लगाएको थियो । उनलाई अहिले अदालतले संरचना निर्माणको क्रममा तेस्रो पक्षलाई सामेल गरेको भन्दै दुई महिनाको लागि जेल पठाएको छ । तर, उनी दोषी सावित भएमा १५ वर्षसम्म जेलमा बिताउनुपर्नेछ ।

उनलाई रसियाको फौजदारी कानुनअनुसार गिरफ्तार गरिएको हो  । जसको भाग ६ को आर्टिकल २९० मा एक मिलियन रुबलभन्दा बढी घुस खाएमा गिरफ्तार गर्ने व्यवस्था रहेको छ । बीबीसी