काठमाडौं । पर्वतका ६९ वर्षीय सूर्यबहादुर जीसी र उनकी पत्नी ६७ वर्षीया कमला जीसीको हत्याको अनुसन्धान जटिल बन्दै गएको छ ।
गत चैत १९ मा पर्वतको जलजला गाउँपालिका–२, का जीसी दम्पतीको धारिलो हरियार प्रयोग गरी हत्या भएको थियो । तर, हत्या भएको दुई साता बित्दा पनि हत्यारा पत्ता लाग्न सकेको छैन । घटना जटिल बन्दै गएपछि प्रहरीको केन्द्रीय अनुसन्धान ब्युरो (सीआईबी)को टोली समेत पर्वत पुगेको छ ।
सीआईबीका प्रहरी निरीक्षकको कमान्डमा टोली बिहीबार पर्वत पुगेको हो । पर्वत प्रहरी र सीआईबीको टोलीले संयुक्त अनुसन्धान अघि बढाएको छ । तर, अहिलेसम्म कुनै नयाँ ‘क्लू’ फेला पार्न सकेको छैन । हत्या गरी लुटपाट गर्ने उद्देश्यले घटना भएको प्रहरीको प्रारम्भिक अनुसन्धानबाट खुलेको छ । हत्यापछि सूर्यबहादुरकी पत्नी कमलाले लगाएको गहना लुटपाट भएको थियो ।
हत्याराको अनुसन्धानका लागि जिल्ला प्रहरी कार्यालय पर्वत, गण्डकी प्रदेश प्रहरी कार्यालय र संघीय प्रहरी एकाइबाट समेत छुट्टाछुट्टै टोली खटिएका छन् । जिल्ला प्रहरी कार्यालय पर्वतका प्रमुख प्रहरी नायव उपरीक्षक (डीएसपी) खुमलाल भुसालले अनुुसन्धान जारी रहेको बताए । “अनुसन्धान जारी नै छ । हामी प्राविधिक विश्लेषण गर्दै छाँै । अहिले नै ठ्याक्कै केही नयाँ कुरा खुलेको छैन,” भुसालले भने ।
जीसी परिवारका तीनमध्ये दुई छोरा भने वैदेशिक रोजगारीका लागि दक्षिण कोरियामा छन् । त्यस्तै, एक छोरा म्याग्दीको बेनीमा बस्दै आएका थिए । हत्यापछि तीनैजना दाजुभाइ घर पुगेका छन् । जीसी दम्पती मात्रै घरमा बस्दै आएका थिए । घर पनि एकान्त भएका कारण घटना जटिल बन्दै गएको हो ।