काठमाडौं । पछिल्लो दुई सातायता काठमाडौंमा उच्च बनेको वायु प्रदूषण सोमबार केही कम भएको छ । वातावरण विभागका अनुसार सोमबार बिहान ११ बजे काठमाडौं उपत्यकाका विभिन्न स्थानमा वायुको गुणस्तर १५५ भन्दा कम छ ।

विभागका अनुसार सोमबार वायुको गुणस्तर एक्यूआई (एयर क्वालिटी इन्डेक्स) रत्नपार्कमा ११३ र भक्तपुरमा १५३ छ ।

अन्तर्राष्ट्रिय सूचकांक आईक्यू एयरकोे सूचीमा भने काठमाडौं सोमबार दिउँसो १२ः४५ बजे पाँचौँ प्रदूषित सहरमा परेको छ । आईक्यू एयरका अनुसार सो समयमा काठमाडौंको वायुको गुणस्तर १५५ यूएस एक्यूआई छ । यो मात्रा गएको चैत २८ मा २०० र २९ गते १९० सम्म पुगेको थियो ।

देशका विभिन्न स्थानमा डढेलोका कारण प्रदूषण उच्च भएको विज्ञले बताएका छन् । शनिबारयता भने डढेलो र आगलागीका घटना कम भएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ ।

गएको शुक्रबार देशका ३१ स्थानमा आगलागी र १९ ठाउँमा डढेलोका घटना भएका थिए । शनिबार २४ स्थानमा आगलागी र पाँच ठाउँमा डढेलोका घटना भए । आइतबार १६ स्थानमा आगलागी र दुई ठाउँमा डढेलो रेकर्ड गरिएको प्राधिकरणले जनाएको छ ।

नेपालमा वैशाख अन्तिमसम्म डढेलोको जोखिम रहने प्राधिकरणले जनाएको छ ।