काठमाडौं । सभामुख देवराज घिमिरेले प्रतिनिधिसभाको चालु अधिवेशन आइतबार (आज) मध्य रातिदेखि अन्त्य हुने जानकारी गराएका छन् । आइतबार प्रतिनिधिसभा बैठकमा उनले सो जानकारी गराएका हुन् । राष्ट्रपतिको कार्यालयबाट प्राप्त पत्र वाचन गर्दै उनले विधेयक अधिवेशनका रूपमा लिइने संसद्को हिउँदे अधिवेशन आइतबार राति १२ बजेदेखि अन्त्य हुने जानकारी गराए ।

गएको माघ २२ गते सुरु प्रतिनिधिसभाको तेस्रो अधिवेशन ७० दिन चालु रह्यो । यो अवधिमा २३ दिनमा २३ पटक बैठक बस्यो । २३ दिनमा ८१ घण्टा ५५ मिनेट संसदीय काम–कारबाहीमा व्यतीत भएको संघीय संसद् सचिवालयले जानकारी गराएको छ ।

विधेयकको अवस्था 
सभामुख घिमिरेले हिउँदे अधिवेशनमा प्रतिनिधिसभामा पाँच सरकारी विधेयक दर्ता गरिएको जानकारी गराए । तीमध्ये निर्माणमुखी सामग्री (व्यवस्थापन तथा नियमन) विधेयक, २०८० समितिमा विचाराधीन रहेको उनले बताए ।

यस्तै, संघीय निजामती सेवा विधेयक, २०८० माथिको सामान्य छलफल समाप्त भएको र राजनीतिक दलसम्बन्धी (दोस्रो संशोधन) विधेयक, २०८० र बैंक तथा वित्तीय संस्थासम्बन्धी (पहिलो संशोधन) विधेयक, २०८० सभामा प्रस्तुत भएको उनले जानकारी गराए ।

“आर्थिक कार्यविधि तथा वित्तीय उत्तरदायित्व (पहिलो संशोधन) विधेयक, २०८० दर्ता मात्रको स्थितिमा रहेको छ । साथै, सभामा उत्पत्ति भएको सम्पत्ति शुद्धीकरण (मनि लाउन्डरिङ) निवारण तथा व्यावसायिक वातावरण प्रवद्र्धनसम्बन्धी केही ऐनलाई संशोधन गर्ने विधेयकमाथि राष्ट्रियसभाबाट गरिएको संशोधनलाई यस सभाले स्वीकार गरी पारित गरेको छ,” उनले भने ।

सभामुख घिमिरेका अनुसार, यो अधिवेशनमा राष्ट्रियसभामा उत्पत्ति भएको तीन सरकारी र एउटा गैरसरकारी विधेयक प्रतिनिधिसभामा प्राप्त भएको थियो । तीमध्ये विद्युतीय व्यापार विधेयक, २०८० माथिको सामान्य छलफल सकिएको छ । बाँकी तीन विधेयक सभामा प्रस्तुत भएको उनले जानकारी गराए ।

यसैगरी, सभाको पहिलो र दोस्रो अधिवेशनमा राष्ट्रियसभाबाट प्राप्त आठमध्ये अनुगमन तथा मूल्यांकन विधेयक, २०७६, खाद्य स्वच्छता तथा गुणस्तर विधेयक, २०७७ सभाबाट पारित भएको उनले जानकारी गराए ।

“बाँकी ६ वटा विधेयक सम्बन्धित समितिमा विचाराधीन नै रहेका छन् । यसरी सभाबाट यो अधिवेशनमा कुल तीनवटा विधेयक पारित भएका छन्,” उनले भने ।

प्रश्नोत्तरको अवस्था 
सभामुख घिमिरेले फागुन ६ र चैत ६ गतेका बैठकहरूमा प्रधानमन्त्रीसँग प्रत्यक्ष प्रश्नोत्तर सञ्चालन गरिएको जानकारी गराए । त्यसक्रममा २६ सांसदले प्रश्न सोधेको र प्रधानमन्त्रीले जवाफ दिएको उनले बताए ।

यस्तै, प्रतिनिधिसभाको चालु अधिवेशनमा विभिन्न मन्त्रालयसँग सम्बन्धित ६५ मौखिक र आठ लिखित प्रश्न दर्ता गरिएको उनले जानकारी गराए । तीमध्ये ३२ मौखिक र दुई लिखित प्रश्नको उत्तर प्राप्त भएको उनले बताए ।

“सभाको २०८० चैत २० गतेको बैठकमा ६ वटा मौखिक प्रश्नहरूको सम्बन्धित मन्त्रीबाट उत्तर दिने कार्य सम्पन्न भयो भने प्रतिनिधिसभा नियमावली, २०७९ को नियम ४५ को उपनियम (३) बमोजिम उत्तर प्राप्त भएका बाँकी मौखिक र लिखित प्रश्नहरूको उत्तर सभामा टेबुल भएका छन्,” उनले भने ।

संसद्को यो अधिवेशनमा प्रतिनिधिसभाअन्तर्गतको महिला तथा सामाजिक मामिला समितिको वार्षिक प्रतिवेदन, २०८० पेस गरिएको छ । “सम्माननीय प्रधानमन्त्री श्री पुष्पकमल दाहाल ‘प्रचण्ड’ले दुईपटक, माननीय उपप्रधानमन्त्री एवम् परराष्ट्रमन्त्री नारायणकाजी श्रेष्ठले दुईपटक र खानेपानीमन्त्री महिन्द्र राय यादव एवं शिक्षा, विज्ञान तथा प्रविधिमन्त्री सुमना श्रेष्ठले एकपटक आकस्मिक, शून्य एवं विशेष समयमा उठेका प्रश्नको सम्बन्धमा जवाफ दिनुभएको थियो,” उनले भने ।

विश्वासको मत 
सभामुख घिमिरेले गएको फागुन ३० गतेको बैठकमा प्रधानमन्त्री पुष्पकमल दाहाल ‘प्रचण्ड’ले विश्वासको मत लिएको जानकारी गराए ।

यस्तै, सभाको दोस्रो अधिवेशनबाट प्राप्त दुई सन्धि–सम्झौतामध्ये बिम्स्टेक बडापत्रलाई चैत २० गते सभाको बैठकबाट अनुमोदन गरिएको उनले बताए । साथै, अन्तर्राष्ट्रिय सौर्य गठबन्धन (आईएसए)को स्थापनासँग सम्बन्धित सम्झौतामाथिको सामान्य छलफल सकिएको उनले जानकारी गराए ।

गएको फागनु १४ गतेको बैठकमा पेस गरिएको आर्थिक वर्ष २०८१/०८२ का लागि विनियोजन विधेयकका सिद्धान्त र प्राथमिकता सम्बन्धमा (कर प्रस्तावबाहेक) माथि छलफल सकिएको उनले बताए ।