काठमाडौं । इरानले शनिबार राति इजरायलमा ३०० भन्दा बढी मिसाइल र ड्रोन प्रहार गरेको छ । इस्लामिक गणतन्त्र इरानले यहुदी राज्यमा गरेको यो पहिलो प्रत्यक्ष आक्रमणले वर्षौंको छायाँ युद्धलाई खुलारूपमा बढाउने चिन्ता बढेको छ । इजरायल डिफेन्स फोर्स (आईडीएफ)ले यो ‘अभूतपूर्व’ आक्रमणमा ड्रोन, क्रुज र ब्यालिस्टिक मिसाइल प्रयोग भएको बताएको छ । 

आफ्नो भूमिमा पुग्नुअघि नै धेरैजसो ड्रोन र मिसाइल रोक्न इजरायल सफल भएको छ । त्यसका लागि इजरायलको वायु सेनाले अमेरिका, जोर्डन र बेलायती वायु सेनाको सहयोग लिएको छ ।

सिरिया, इराक र जोर्डनको आकाशमा नै इजरायलले इरानी आक्रमण रोकेको बताइएको छ । थप ड्रोन र मिसाइल इरानी क्षेत्रमै आइरन डोम एयर डिफेन्स इन्टरसेप्टर प्रणालीबाट रोकिएको इजरायले जनाएको छ ।

इजरायलको तेल अभिव र अन्य सहरहरूमा आइतबार बिहान साइरन एवं इजरायली वायुसेनाका जेट विमान आवाज चर्किएको थियो । केही मिसाइलले रक्षा प्रणालीमा क्षति गरेको बताइएको छ ।

आईडीएफका प्रवक्ता रियर एडमिरल ड्यानियल हगारीले भनेका छन्, “अधिकांश क्षेप्यास्त्रहरू इजरायलको सीमाबाहिर रोकिएको थियो । केही मिसाइलहरू मात्र इजरायली क्षेत्रभित्र खसे ।”

इरानको रिभोलुसनरी गार्ड कोर्प (आईआरजीसी)ले इजरायलमा आक्रमण गरेको पुष्टि गरेको छ । एक विज्ञप्ति जारी गर्दै आईआरजीसीले भनेको छ, “जियोनिस्ट शासनका कयौँ अपराध...र सिरियामा हाम्रो देशका कमान्डर एवं सैन्य सल्लाहकारको सहादतको बदलामा आईआरजीसीको एयरोस्पेस डिभिजनले कब्जा गरिएका क्षेत्रभित्र केही लक्ष्यमा १०औँ मिसाइल र ड्रोनहरू प्रहार गरेको छ ।”

अमेरिकी राष्ट्रपति जो बाइडेनले इजरायललाई ‘आइरनक्लाड–फलामले ढाकेजस्तो’ समर्थन रहेन र त्यसतर्फ प्रहार भएका सबै ड्रोन र मिसाइल रोक्न सहयोग गरेको बताएका छन् ।

बेलायतका रक्षामन्त्री ग्रान्ट शाप्सले आक्रमणको निन्दा गर्दै यस क्षेत्रमा रोयल एयर फोर्स (आरएएफ)का विमानहरू तैनाथ गरिएको बताएका छन् ।