काठमाडौं । राष्ट्रिय प्रजातन्त्र पार्टी (राप्रपा)का उपाध्यक्ष रवीन्द्र मिश्रले मंगलबार आफूहरूले ‘ट्रेलर’ देखाएको बताएका छन् । थापाथलीमा आयोजित कोणसभामा उनले अब ‘फिल्म’ देखाउने बताए ।

“आज ब्लकबस्टर फिल्मको ट्रेलर मात्रै देखाएका छौँ,” उनले भने, “फिल्म अब सुरु हुन्छ ।”

मिश्रले प्रहरीले गरेको बल प्रयोगलाई उपप्रधान एवं गृहमन्त्री रवि लामिछानेसँग जोडे । लामिछाने सञ्चारकर्मी भएको भए आजको ‘दमन’ हेरेर गृहमन्त्रीलाई नालायक घोषणा गर्ने उनको भनाइ थियो ।

“सञ्चारकर्मी भएको भए रवि लामिछानेले ठूलो स्वरमा भन्नुहुने थियो– नालायक गृहमन्त्रीले मात्र यस्तो दमन गर्छ,” मिश्रले भने, “तर, उहाँ आफैँ गृहमन्त्रीको कुर्सीमा बसेर जनताको स्वतन्त्रतामाथि दमन हुँदै छ । उहाँ के भन्नुहुन्छ ?”

• राप्रपाका प्रदर्शनकारीले निषेधित क्षेत्र तोड्न खोजेपछि... (तस्बिरहरू)

मिश्रले सम्बोधनको धेरैजसो समय प्रहरीका विषयमा खर्चिएका थिए । ३० हजार रुपैयाँ तलबमा खाने, लाउने, सन्तान पाल्ने, पढाउने अवस्था नभएको भन्दै उनले व्यवस्था बदल्ने अभियानमा साथ दिन आह्वान गरे ।

“तपाईंहरू (प्रहरी) हिजो माओवादी युद्धमा माओवादीसँग लड्नुभयो, अंगभंग भयो, ज्यान गुम्यो । कांग्रेस, एमालेले गरेको आन्दोलनमा लड्नुभयो, घाइते हुनुभयो । तपाईंहरूको अवस्था कहिले परिवर्तन हुन्छ ?,” मिश्रले भने, “अब नागरिक देशमा बस्न नसक्ने, देशप्रति आशा नजाग्ने यो व्यवस्था ढाल्न साथ दिनुहोस् ।”