काठमाडौं । विश्व फुटबलको सर्वोच्च निकाय फिफा वरीयतामा नेपाली फुटबल टिम तीन स्थान घटुवामा परेको छ । फिफाले बिहीबार अद्यावधिक गरेको वरीयताअनुसार नेपाल हाल १७८औँ स्थानमा छ । यसअघि नेपाल वरीयताको १७५औँ स्थानमा थियो ।
फिफा विश्वकप–२०२६ छनोटको दोस्रो चरणका खेलमा खराब नतिजा निकालेपछि नेपाल घटुवामा परेको हो । छनोटको दोस्रो चरणमा समूह ‘एच’ मा रहेको नेपालले ‘फेब्रुअरी विन्डो’मा बहराइनसँग दुई खेल खेलेको थियो । नेपालको एकमात्र अन्तर्राष्ट्रिय स्तरको मैदान दशरथ रंगशाला खेल्न योग्य नभएपछि ‘होम र अवे’ दुवै खेल बहराइनमै खेलेको नेपालले पहिलो खेलमा ५–० र दोस्रो खेलमा ३–० को हार बेहोरेको थियो ।
वरीयताको दक्षिण एसिया (साफ)मा भारत शीर्ष स्थानमा छ । तर, ‘फेब्रुअरी विन्डो’ मा भारतको प्रदर्शन पनि निराशजनक भएपछि सुनिल क्षेत्रीको कप्तानीमा रहेको टिम चार स्थान खस्किएको छ । भारतले विश्वकप छनोटको दोस्रो चरणमा अफगानिस्तानविरुद्ध पहिलो खेल बराबरी खेल्दा दोस्रोमा भने २–१ को हार बेहोरेको थियो ।
यसअघि ११७औँ स्थानमा रहेको भारत हाल १२१औँ स्थानमा झरेको छ । यस्तै, साफको दोस्रो स्थानमा रहेको माल्दिभ्स १६१औँ स्थानमा छ । चौथो स्थानको बंगलादेश १८४औँ, पाँचौँ स्थानको भुटान १८५औँ, छैटौँ स्थानको पाकिस्तान १९५औँ र सातौँ स्थानको श्रीलंका २०४औँ स्थानमा छ ।
विश्व वरीयतामा भने विश्वकप विजेता अर्जेन्टिना शीर्ष स्थानमा कायमै छ । दोस्रो स्थानमा फ्रान्स, तेस्रो स्थानमा बेल्जियम, चौथोमा इंग्ल्यान्ड र पाँचौँमा ब्राजिल छन् ।
