काठमाडौं । लागुऔषध लुटपाट गर्ने योजना बनाएका युवाले ट्याक्सी चालकमाथि कुटपिट र लुटपाट गरेका छन् । लुटपाट गर्ने सो समूह पक्राउ परेसँगै उक्त योजना सार्वजनिक भएको हो ।

सो समूहलाई काठमाडौं प्रहरीको विशेष टोलीले पक्राउ गरी सार्वजनिक गरेको छ । पक्राउ पर्नेमा काठमाडौंकै तारकेश्वर नगरपालिकाका २७ वर्षीय प्रशान्तजंग कार्की र बूढानीलकण्ठ नगरपालिकाका ३४ वर्षीय राजु गुरुङ छन् । ट्याक्सी चालकसँग लागुऔषध रहेको सूचनाका आधारमा लुटपाट गरेको उनीहरूले प्रहरीसँग बताएका छन् ।

जिल्ला प्रहरी परिसर काठमाडौंका प्रवक्ता एवं एसपी नवराज अधिकारीका अनुसार, गएको मंगलबार राति १० बजे बूढानीलकण्ठ–१२, कपन दुर्गा मन्दिरनजिक बा२ज ३५९८ नम्बरका ट्याक्सी चालकलाई रोकेर उनीहरूले लुटपाट गरेका थिए ।

उनीहरूले चालकको साथबाट मोबाइल, १८ हजार रुपैयाँ, ट्याक्सीको ब्लु बुक र ल्यापटप लुटेका थिए । शुक्रबार साँझ प्रहरीले उनीहरूलार्ई वसुन्धाराबाट पक्राउ गरेको हो । उनीहरूका साथबाट प्रहरीले ट्याक्सी चालकको मोबाइल फेलापारेको छ ।