काठमाडौं । इन्डियन प्रिमियर लिग (आईपीएल)मा राजस्थान रोयल्सले विजयी सुरुआत गरेको छ । आइतबारको पहिलो खेलमा राजस्थानले लखनउ सुपर जायन्ट्सविरुद्ध २० रनको रोमाञ्चक जित निकाल्दै आईपीएलको १७औँ संस्करणमा विजयी सुरुआत गरेको हो । 

सवाई मानसिंह रंगशाला जयपुरमा भएको खेलमा राजस्थानले प्रस्तुत गरेको १९४ रनको लक्ष्य पछ्याउने क्रममा लखनउले निर्धारित २० ओभरमा ६ विकेट गुमाएर १७३ रनमात्र बनाउन सक्यो । 

लखनउका निकालेस पुरनले ६४ रन बनाए पनि टिमको हार टार्न सकेनन् । कप्तान केएल राहुलले ५८ रन थपे । यसबाहेक, दीपक हुडाले २६ रन थप्दा अन्यले दोहोरो अंकमा रन जोड्न सकेनन् ।

राजस्थानका ट्रेन्ट बोल्टले दुई विकेट लिए । नान्द्रे बर्गर, रविचन्द्रन आश्विन, युजवेन्द्र चहल र सन्दीप शर्माले समान एक विकेट लिए । 

त्यसअघि टस जितेर ब्याटिङमा आएको राजस्थानले निर्धारित २० ओभरमा चार विकेट गुमाएर १९३ रनको योगफल खडा गरेको थियो । राजस्थानका कप्तान सञ्जु सामसनले ८२ रन बनाए । उनले ५२ बलमा तीन चौका र ६ छक्का प्रहार गरे । रियान परागले ४३ रन थपे । यशस्वी जयशवालले २४ र ध्रुव जुरेलले २० रन थपे । 

नविन उल–हकले दुई विकेट लिए । मोहसिन खान र रवि विस्नोइले समान एक विकेट लिए ।

जितसँगै दुई अंक जोडेको राजस्थान तालिकाको शीर्ष स्थानमा उक्लिएको छ । हारबाट प्रतियोगिताको सुरुआत गरेको लखनउ तालिकाको आठौँ स्थानमा छ ।