काठमाडौं । नेकपा (माओवादी केन्द्र)का उपाध्यक्ष कृष्णबहादुर महरा पक्राउ परेको विषयमा पार्टीको पदाधिकारी बैठकमा छलफल गरिएको छ । मंगलबार बिहान प्रधानमन्त्रीको सरकारी निवास बालुवाटारमा बसेको माओवादी केन्द्रको पदाधिकारी बैठकमा त्यसबारे छलफल गरिएको हो ।

छलफलपछि सञ्चारकर्मीसँग कुरा गर्दै पार्टी प्रवक्ता अग्निप्रसाद सापकोटाले सोबारे पुनः बैठक बसेर निर्णय गरिने बताए । “तपाईंहरूले जान्न खोज्नुभएको उपाध्यक्ष कमरेड कृष्णबहादुर महराको बारेमा छ । हाम्रो धेरै राम्रोसँग छलफल भइरहेको छ । यसका हरेक पाटा, पक्षमा हामीले गम्भीरतापूर्वक छलफल गरेका छौँ,” उनले भने, “छलफल जारी छ । छिटोभन्दा छिटो निष्कर्षमा पुग्छौँ ।”

सुन तस्करी प्रकरणमा सोमबार (हिजो) भैरहवाबाट उपाध्यक्ष महरालाई प्रहरीले पक्राउ गरेको थियो । काठमाडौं जिल्ला अदालतले चार दिनको म्याद थप गरी महरामाथि अनुसन्धान गर्न अनुमति समेत दिइसकेको छ । न्युज एजेन्सी नेपाल