काठमाडौं । नेकपा (एमाले)का नेता रघुजी पन्तले नेपालका खानीहरूमा रहेको निर्माणमुखी सामग्री निकासी गर्न सक्ने गरी विधेयक ल्याउन नहुने बताएका छन् । बिहीबार प्रतिनिधिसभा बैठकमा उनले यस्तो बताएका हुन् ।

विधेयकमा सरकारले नेपालको खोलानदीमा भएका गिट्टी, बालुवा, ढुंगाजस्ता निर्माण सामग्री निकासी गर्न पाउने व्यवस्था राखेको भन्दै उनले सो विषय तत्काल हटाउन माग गरे । उनले मुलुकभित्र रहेका निर्माणजन्य सामग्री विदेशमा निर्यात गर्नेभन्दा पनि देशभित्रै खपत गर्नुपर्नेमा जोड दिए ।

उनले विधेयकको दफा ४२ मा ‘सरकारले चाहेमा निकासीमा रोक लगाउन सक्ने’ भन्ने शब्दले निर्माण सामग्रीको स्रोतबाट गिट्टी, बालुवा, ढुंगाजस्ता निर्माण सामग्री निकासी गर्न सक्ने बुझिएकाले हटाउन माग गरे । उनले सर्वोच्च अदालतले निर्माण सामग्री विदेश निकासी गर्न रोक लगाएकाले त्यो विषयमा सरकारले कानुन बनाउन नहुने बताए ।

नाफाका निम्ति निकासी गर्न छुट दिए भविष्यमा आवश्यक परेको खण्डमा यस्ता निर्माण सामग्री नेपालले पाउन नसक्ने उनले उल्लेख गरे । उनले निर्माणमुखी सामग्री प्रयोग गर्दा दीर्घकालीन स्रोतका रूपमा हेर्नुपर्नेमा जोड दिए ।

उनले वातावरण र जलवायु परिवर्तनलाई थप असर पुर्‍याउने विषयमा सचेत भएर निर्माणजन्य सामग्रीको प्रयोगमा ध्यान दिन जरुरी रहेको औँल्याए । छिमेकी देशको दबाबले हरेकपटक निर्माणजन्य सामग्री निकासीको विषय आउने गरेको उनको भनाइ थियो । न्युज एजेन्सी नेपाल