काठमाडौं । नेपाली कांग्रेसका प्रवक्ता डा. प्रकाशशरण महतले चीनको परियोजना वेल्ड एन्ड रोड इनिसियटीभ (बीआरआई) कार्यान्वयनमा जान आफूले रोकेको भन्ने आरोप पनि कपोलकल्पित भएको बताएका छन् । 

मंगलबार पार्टी कार्यालय सानेपामा पत्रकार सम्मेलन गर्दै उनले प्रधानमन्त्री चीन भ्रमणमा जाँदा निर्णय नगरी आउने अनि आफूलाई दोष दिन मिल्छ भन्दै प्रश्न गरे । “म चाहिँ अर्थमन्त्री नभएर प्रधानमन्त्री थिए कि भनेजस्तो भयो । उहाँ जानुहुन्छ चीन भ्रमणमा म गएको पनि छैन । उहाँले निर्णय नगर्ने अनि त्यसको दोष अर्थमन्त्रीलाई दिने ?,” उनले भने । 

महतले आफू परराष्ट्रमन्त्री हुँदा बीआरआई सम्झौता भएको स्मरण गरे । “हामीले ऋण लिनका लागि प्राथमिकता क्षेत्रको निर्धारण गर्नुपर्छ भन्यौँ । दोस्रो कुरा वल्र्ड बैंक एडीबीले जुन ऋण दिन्छ सस्तो व्याजदरमा एक प्रतिशत तल त्यस्तै किसिमको ऋण लिनुपर्छ भन्यौँ,” उनले थपे, “कम सर्त राखिएको , सहुलियतपूर्ण ऋण वा अनुदान भएमात्र सहयोग स्वीकार गर्नुपर्छ भनेका हौँ ।” 

उनले यो विषय चीनको पक्षमा मात्र लागु नहुने भन्दै भारत कोरिया जुनसुकै देशले पनि ऋण सहयोग दिन खोजेको र सबैका लागि यही नीति अवलम्वन गरिएको जानकारी दिए । “सबैका लागि एकै नीति छ । चीनका लागि छुट्टै, भारतका लागि अर्कै, युरोप अमेरिकाका लागि फरक फरक नीति छैन । यो सबै कपोलकल्पित विषय हो,” उनले पत्रकार सम्मेलनमा भने ।