काठमाडौं । सञ्चार तथा सूचना प्रविधिमन्त्री रेखा शर्माले राष्ट्रियसभा अध्यक्षबारे सत्ता गठबन्धनमा आबद्ध सबै दल सहमत रहेको बताएकी छन् । सोमबार मन्त्रिपरिषद्को निर्णय सार्वजनिक गर्ने क्रममा सञ्चारकर्मीले सोधेको प्रश्नमा उनले सहमतिका आधारमा नेकपा (माओवादी केन्द्र)का तर्फबाट उमेदवारी दिइएको बताइन् ।

• तीन प्रदेश प्रमुखलाई हटाउने मन्त्रिपरिषद्को निर्णय
• प्रचण्डका भाइ नारायण दाहाल बन्दै छन् राष्ट्रियसभा अध्यक्ष 

“माओवादी केन्द्रले उमेदवार अघि सारेको छ । अहिलेको नयाँ सहकार्यमा आबद्ध सबै दलमा सहमत छ,” उनले भनिन् ।

सरकारका प्रवक्ता समेत रहेकी शर्माले निरन्तर आन्दोलनमा लागेका व्यक्तिलाई नातावाद भन्नु उचित नहुने बताइन् । सत्ता गठबन्धनका तर्फबाट राष्ट्रियसभा अध्यक्ष पदका निम्ति उमेदवारी दिएका नारायण दाहाल प्रधानमन्त्री पुष्पकमल दाहाल ‘प्रचण्ड’का भाइ नाता पर्ने व्यक्ति हुन् । 

“उहाँ दाहाल पनि हो, टाढाको नाता पर्ने भाइ पनि हो । पार्टीको नेता पनि हो । निरन्तर आन्दोलनमा भएको व्यक्तिप्रति नातासम्बन्ध पर्‍यो भन्ने कुरामा चर्चा गर्नु उपयुक्त हुँदैन,” उनले भनिन् ।