काठमाडौं । राष्ट्रियसभा अध्यक्ष पदका उमेदवार नारायण दाहालले आफूलाई पुष्पकमल दाहाल ‘प्रचण्ड’को भाइ भनेको सुन्दा ‘कान पाकिसकेको’ बताएका छन् ।
अध्यक्षका निम्ति सोमबार उमेदवारी दर्ता गराएपछि सञ्चारकर्मीलाई प्रतिक्रिया दिँदै उनले प्रचण्डको भाइ भनेर पार्टीको प्रदेश सहइन्चार्जको जिम्मेवारी समेत नदिइएको स्मरण गरे ।
“यी कुरामा कान पाकिसके । मुख थाकिसके । म ०६३ सालमा अन्तरिम व्यवस्थापिकामा प्रवेश गरेँ । त्यो बेलादेखि नै मैले कुनै जिम्मा लिन पर्दाखेरि जुन ढंगले यो पार्टीमा योगदान दिएँ, सामान्यतया कुनै प्रदेशको सहइन्चार्जको रूपमा जाँदा’नि त्यो खालको आरोप लाग्ने गरेको छ,” दाहालले भने ।
उनले आफू ०३६ सालदेखि पार्टीमा लागेको र युद्ध लडेको बताए । आफ्नो बारेमा जानकारी नहुनेले प्रचण्डका भाइ भएका कारण जिम्मेवारी पाएको भन्ने प्रश्न सोध्न नमिल्ने उनको भनाइ थियो ।
“म ०३६ सालमा यो पार्टीमा प्रवेश गर्दा तपाईं कति वर्षको हुनुहुन्थ्यो भन्छु के मैले ! जसलाई म कुन बेला कसरी लागेँ भन्ने कुरा र युद्धमा कहाँ कसरी खटेँ भन्ने कुरा जसलाई थाहा नै छैन, उसैले यो प्रश्न गर्दा कति न्यायसंगत हुन्छ ?,” उनले प्रश्न गरे ।
दाजुभाइ नै युद्धमा जान मिल्दैन भनेर त्यति बेला कसैले नरोकेको र अहिले जिम्मेवारी लिन खोज्दा प्रश्न उठाइएको उनले बताए ।
“अहिले दाजुभाइको नाता पर्ने हिसाबकिताबले हुन्न भन्यो भने म युद्धमा हिँड्दाखेरि दाइ हिँडेको छ, तँ हिड्नु हुन्न भन्न किन आएनन् ? अहिले पाउँदैन जिम्मेवारी भन्नेले दाइ युद्धमा हिँडेको छ, तँ किन हिँडेको, मिल्दैन भनेर कसैले भनेन । त्यो बेला एक दिन ढिला भयो भने आफ्नालाई बचाउन भन्ने कुरा आउँथ्यो । यसमा मेरो धेरै भन्नु छैन,” उनले भने ।
-1743849429.jpg)
