काठमाडौं । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले मुलुकको अवस्थामा परिवर्तन भएन भन्नु सही नभएको बताएका छन् । राष्ट्रिय प्रजातन्त्र पार्टी (राप्रपा)ले अवस्था परिवर्तन नभएको भन्दै व्यवस्थाको विकल्प खोजिरहेका बेला उनले सो भनाइमा सत्यता नभएको बताएका हुन् ।

“...एउटा अलि चर्चा चल्ने गरेको छ कि व्यवस्था परिवर्तन भयो, अवस्था परिवर्तन भएन भन्ने कुरा होइन । त्यस्तो हल्ला चल्ने गरेको छ,” उनले भने, “तर, अवस्थामा परिवर्तन आएको छ ।”

शनिबार काठमाडौंमा मोतीदेवी स्मृति केन्द्रले आयोजना गरेको कार्यक्रममा उनले अहिले ४० प्रतिशतको हाराहारीमा महिला जनप्रतिनिधि रहेको उल्लेख गरे । ‘विगतमा त्यस्तो थियो ?’ भनी उनले प्रश्न समेत गरे ।

३३ प्रतिशत महिला संसद् र सरकारी निकायमा प्रतिनिधित्व संविधानमै सुनिश्चित भएको दृष्टान्त उनले पेस गरे । उनले अहिले विगतमा भन्दा तुलना नै गर्न नसक्ने गरी जनताको अवस्था राम्रो भएको तर्क गरे ।

“...अवस्था परिवर्तन भएको छ । अवस्था फेरिएको छ । अवस्था पहिलेभन्दा तुलना नै गर्न नसक्ने गरी राम्रो भएको छ,” उनले भने ।

उनले जनताको अवस्थालाई पूर्ण रूपमा राम्रो बनाउने गरी काम गर्नुपर्ने जिम्मेवारी पनि आफूहरूको काँधमा रहेको बताए । महिलालाई पुरुषसरह अधिकार दिलाउने विषयमा आफ्नो पार्टी लागिपर्ने समेत उनले उल्लेख गरे । न्युज एजेन्सी नेपाल