श्वेत पर्वत
(नियात्रासंग्रह: विष्णुप्रसाद शर्मा पराजुली)
नियात्रा साहित्यमा क्रियाशील सर्जक हुन्, विष्णुप्रसाद शर्मा पराजुली । उनका केही नियात्राकृति प्रकाशित भइसकेका छन् । तिनैमध्ये पर्वतीय शृंखला क्षेत्रमा गरिएको भ्रमणको इतिवृत्त कोरिएको कृति हो, ‘श्वेत पर्वत’ ।

लेखकीयमा कृतिकार पराजुलीले लेखेका छन्, “पुस्तकमा धवलागिरि, अन्नपूर्ण, मुस्ताङ र मनाङ गरी चार खण्ड रहेका छन् । यस क्षेत्रमा विभिन्न जातजातिको बसोबास भए तापनि उच्च हिमाली क्षेत्रमा बसोबास गर्ने नेपालकै प्रमुख आदिवासी जनजातिमध्ये मगर, गुरुङ र थकालीको मूल थलो यसै भेगमा पर्दछ । ...।”

यो कृतिभित्र चार खण्डमा ३९ नियात्रा समेटिएको छ ।

भुँडीपुराण प्रकाशनबाट प्रकाशित ३५२+४ पृष्ठको यो पुस्तकको मूल्य ४९०/– रुपैयाँ राखिएको छ ।
०००

योगीराज गणपति स्वामी
(जीवनी: कमलप्रसाद ढुङ्गाना)
योगीराजको जीवनका यावत् पक्षलाई समेटेर कमलप्रसाद ढुङ्गानाद्वारा लेखिएको जीवनीपरक पुस्तक हो, ‘योगीराज गणपति स्वामी’ । पुस्तक केही समयअघि बजारमा ल्याइएको छ ।

जीवनीमा लेखकले गणपति स्वामीको जन्मकालदेखिका विभिन्न सन्दर्भलाई समेटेका छन् । यसमा ‘आमाबाट शिक्षा प्रारम्भ’, ‘विवाह नगर्ने निर्णय’, ‘श्मशानको वास’, ‘राजपरिवारको अभिमानमा धक्का’ लगायत ४२ शीर्षकमा सन्दर्भ प्रस्तुत गरिएको छ ।

रत्न पुस्तक भण्डार (रत्न धार्मिक ग्रन्थ) द्वारा प्रकाशित १३२+४ पृष्ठको यो पुस्तकको मूल्य २९५/– रुपैयाँ राखिएको छ ।
०००

बाबा मेरो पीआर आयो
(कथासंग्रह: भागवत खनाल)
कथा र निबन्ध विधामा समान रूपले कलम चलाउने स्रष्टा हुन्, भागवत खनाल । उनको कथाकृति केही समयअघि सार्वजनिक गरिएको छ, ‘बाबा मेरो पीआर आयो’ । यसको शीर्षकले नै अहिलेको समय र युवा मानसिकताको संकेत गर्छ ।

कृतिकार खनालले लेखकीयमा लेखेका छन्, “कथाकार फगत कथाकार मात्र नभइ विद्रोही पनि हो । आफ्नो अन्तःकरणलाई चिमोटिरहने उदासी, भय, अभाव, कलह एवं परिस्थितिले पैदा गरेका असहमति र बेखुसीहरूलाई अक्षरका माध्यमबाट छ्याल्लब्याल्ल पारेर सन्तुष्ट हुने जीव हो कथाकार ।”

पुस्तकको ब्लर्बमा चर्चित कथाकार नयनराज पाण्डेले लेखेका छन्, “...शिल्प र प्रस्तुतिमा चामत्कारिक प्रभाव उत्पन्न गर्ने निहुँमा कुनै गिमिक्समा फस्दैनन् उहाँका कथाहरू । त्यसैले उहाँको कथा लेखन मेरा लागि सम्मानयोग्य विषय हो । ...।”

ब्लर्बमै कथाकार अभय श्रेष्ठले लेखेका छन्, “...जुनसुकै विधामा उत्तिकै राम्रो लेख्ने क्षमता छ उहाँमा । नजानिँदो ईष्र्या पनि लाग्छ । ...।”

विनीता खनालद्वारा प्रकाशित २८०+४ पृष्ठको यस पुस्तकको मूल्य ४५०/– रुपैयाँ राखिएको छ ।
०००

पर्दाभित्र...
(उपन्यास: गंगाप्रसाद भेटवाल)
उपन्यासकार गंगाप्रसाद भेटवालले पाठकका निम्ति प्रस्तुत गरेको औपन्यासिककृति हो, ‘पर्दाभित्र...’ ।

कृतिभित्र लेखकीयमा भेटवालले लेखेका छन्, “...समाजका हरेक क्षेत्रमा विकृतिले जरो गाडेको र युवाशक्ति देशबाट दैनन्दिन पलायन हुँदै स्थायी रूपमा नै अरू मुलुकमा बस्न जाने क्रम बढेको देखेपछि युवाहरूलाई देशभित्र नै बस्ने वातावरण सिर्जना गर्नुपर्छ, त्यसका लागि सचेत र स्वस्थ्य युवा नै अघि सर्नुपर्छ भन्ने मूल भावको केन्द्रीयतामा यो उपन्यास तयार गरेको हुँ । ...।”

अनुसन्धान विमर्श नेपालद्वारा प्रकाशित १८८+४ पृष्ठको यो उपन्यासको मूल्य ३५०/– रुपैयाँ राखिएको छ ।
०००

छचल्का
(लघुकथासंग्रह: सं. विमल भौकाजी)
पछिल्लो समय लघुकथा लेख्नेहरूको संख्या बढ्दै गएको छ । त्यही भीडमा राम्रा लघुकथा र लघुकथाकार पनि आइरहेका छन् ।

विभिन्न लघुकथाकारका रचनालाई एकै ठाउँमा ल्याएर आफ्नो सम्पादनमा विमल भौकाजीले ठाउँ दिएका छन्, ‘छचल्का’ कृतिमार्फत । यो संग्रहमा ९९ लघुकथाकारका रचना समावेश गरिएको छ ।

सम्पादकीयमा भौकाजीले लेखेका छन्, “...आकारका हिसाबले कुनै साना र कुनै अलिक लामा लघुकथा छन् । अक्षर गनिएका छैनन् । तर, पाठकले यी सबै रचनाका मर्मलाई समान गणना गर्नु हुनेछ भन्नेमा हामी आशावादी छौँ । ...।”

भुँडीपुराण प्रकाशनद्वारा प्रकाशित २०४+४ पृष्ठको यो पुस्तकको मूल्य ३९०/– रुपैयाँ राखिएको छ ।