काठमाडौं । पाँचपोखरी क्रिकेट क्लब र ह्योल्मो–११ पाँचपोखरी जिल्लास्तरीय ट्वान्टी–२० क्रिकेट प्रतियोगितामा समूह विजेता बन्दै सेमिफाइनलमा स्थान पक्का गर्न सफल भएका छन् । 

मूलपानी क्रिकेट मैदानमा विजय धितालको उत्कृष्ट प्रदर्शनमा पाँचपोखरीले मेलम्ची नगरपालिकालाई तीन विकेटले हराउँदै अन्तिम–४ यात्रा तय गरेको हो । खेलमा पहिलो ब्याटिङ गरेको मेलम्चीले १७.१ ओभरमा मात्र ९६ रनमा अलआउट भएको थियो । 

मेलम्चीका ओपनर रिन्जिन लामाले २५ रन र सोनु देवकोटाले २६ रन जोड्नुबाहेक अन्यले दोहोरो अंकमा रन जोड्न सकेनन् । पाँचपोखरीका विजय धितालले ३.१ ओभरमा नौ रन खर्चेर तीन विकेट लिए । मनोज खड्काले तीन र सार्थक धितालले दुई विकेट लिएका थिए । ९७ रनको लक्ष्यसहित ब्याटिङमा आएको पाँचपोखरीले १९.२ ओभरमा सात विकेट गुमाएर लक्ष्य पूरा गर्‍यो । 

पाँचपोखरीको जितमा लाक्पा लामाले २४, ओपनर सार्थक धितालले २० र विजय धितालले १४ रन जोडे । मेलम्चीका रिन्जिन लमा र रामकृष्ण दुलालले समान दुई विकेट लिए । हारका बावजुद मेलम्ची समूह उपविजेता बन्दै प्रतियोगिताको सेमिफाइनमला प्रवेश गरेको छ । 

अर्को खेलमा भोटेचौर स्पोर्ट्स क्लबमाथि नौ विकेटको जित निकाल्दै ह्योल्मो–११ समूह विजेता बन्यो । नाम्गिल शेर्पाको उत्कृष्ट ब्याटिङमा ह्योल्मोले १२० रनको लक्ष्य १७ ओभरमा एक विकेट गुमाएर पूरा गर्‍यो । ‘प्लेयर अफ द म्याच’ नाम्गिलले ५६ बलमा आठ चौका र एक छक्कासहित अविजित ६६ रन जोडे । विनोद तामाङले ३८ बलमा सात चौकासहित ४३ रन बनाए । त्यसअघि पहिलो इनिङमा भोटेचौरले नौ विकेट गुमाएर ११९ रन जोडेको थियो । 

भोटेचौरका ओपनर दुर्गेश थापाले ४२ रन जोडेपनि अन्य ब्याटर बाट राम्रो साथ पाएनन् । ह्योल्मोका फुर्पा शेर्पा, राहुल लामा र दावा सोनाम शेर्पाले समान दुई विकेट लिए । ह्योल्मो–११ समूह विजेता बन्दा पाँचपोखरी हिमालयन क्रिकेट क्लब उपविजेताको रुपमा सेमिफाइनल प्रवेश गरेको छ ।