गोदावरी । नेपाली कांग्रेसका महामन्त्री गगनकुमार थापाले भ्रष्टाचारीलाई कांग्रेसको वरिपरि राख्नै नहुने बताएका छन् । बिहीबार महासमिति बैठकको समापन समारोहलाई सम्बोधन गर्दै थापाले भ्रष्टाचारमा मुछिएकालाई कांग्रेसको वरिपरि नराखे पार्टीको शक्ति आफैँ बढ्ने बताए ।

"भ्रष्टाचारमा मुछिएकालाई कांग्रेसले वरिपरि राख्दिनँ भन्नुपर्छ," उनले भने, "त्यसपछि हाम्रो शक्ति आफैँ बढ्छ ।"

थापाले सरकारमा गएर पनि काम गर्न नसक्ने मन्त्रीहरूलाई फिर्ता बोलाउनुपर्ने पनि बताए । 

"काम गर्न नसकेको मन्त्रीलाई विश्राम दिऔँ, फिर्ता बोलाऔँ," उनले भने, "भ्रष्टाचारी नेतालाई पाता कसेर लडाउँछौँ । तपाईंहरू संगठन निर्माणमा ध्यान दिनू, कांग्रेसले यो यो गर्‍यो भनेर जनतालाई सुनाउनू ।"

उनले पार्टी एक्लै चुनाव लड्न सक्ने विषयमा पनि प्रस्ट पारे । "कांग्रेस एक्लै लड्न सक्छ भन्ने हुती राखेर यो हलबाट बाहिर जाने हो । पार्टीभित्र न्याय र सम्मान होस् भन्नुभएको छ । हामीलाई जिम्मेवारी दिनुभएको छ," उनले भने, "नेपाली कांग्रेसले देशको सबै समस्या समाधान गरोस् भनेर तपाईंहरूले भन्नुभएको छ । बीपीले भन्नुभएको थियो– इतिहासले गौरव दिए जिम्मेवारी पनि लिनुपर्छ । हामी त्यो लिन तयार छौँ । हाम्रो इतिहासप्रति गौरव पनि छ ।"

महामन्त्री थापाले नेताको नाममा सहकारीबाट ठग्नेलाई कांग्रेसले ठिक ठाउँमा ल्याउनुपर्ने पनि बताए । उनले ०८४ मा सरकारमा जाने कुरा नभई पार्टी अहिले नै सरकारमा रहेको र यो बेला गरेको काम लिएर चुनावमा जानुपर्ने बताए ।

"हामी ०८४ मा सरकारमा जान्छौँ होइन, अहिले नै सरकारमा छौँ । अहिले गरेका काम देखाएर झन् बढी मत ल्यायौँ, फेरि सरकारमा जाऔँ । ०४६ सालपछि सार्वजनिक पदमा रहेका व्यक्तिको सम्पत्ति छानबिन होस् भनेर संसद्‌मा कांग्रेसले पेस गर्नुपर्ने छ," थापाले भने ।