काठमाडौं । नेपाली कांग्रेसका केन्द्रीय सदस्य गणेश लामाले आफूमाथि अपहरणको झुटो आरोप लागेको दाबी गरेका छन् ।

बुधबार व्यवसायी ज्ञानेन्द्र खड्काले आफूलाई लामाले अपहरण गरी २० करोड रुपैयाँको कागज बनाएको दाबीसहित सामाजिक सञ्जालमार्फत विज्ञप्ति सार्वजनिक गरेका थिए । उनले अपहरणको घटना गत पुस २३ को भए पनि सुरक्षाका कारण अहिले सार्वजनिक गरेको बताएका छन् ।

तर, लामाका अनुसार खड्का उनका १० वर्षअघिका व्यापारिक साझेदार हुन् । खड्काले नै आफूलाई बैंककमा होटेल खोल्न पैसा हाल्न लगाएको लामाको दाबी छ । 

उनै खड्काले धुलिखेलको ४० आना जग्गा आफ्नी श्रीमतीको नाममा पास गरेको तर अहिलेसम्म पनि आफूलाई जग्गा र पैसा नदिएको लामा बताउँछन् । पैसाको कागज गरेपछि खड्काले आफ्नो चरित्र हत्या गर्न खोजेको उनको आरोप छ ।

“महेश बस्नेत भन्ने मेरो पार्टनरको नामबाट २०७१ साल ६ महिना ३० गते उनकी श्रीमती नानीमैय्या कार्कीको नाममा धुलिखेलको ४० आना जग्गा पास गरिएको थियो । दश वर्षसम्म सम्पर्कमा नआएका खड्कासँग भेट हुँदा प्रहरीमा जाने कि हामी मिलाउने भनेर सोधेँ । उनले नै पैसा दिन्छु कागज गरौँ भनेपछि कागज गरिएको हो,” बाह्रखरीसँगको कुराकानीमा लामाले भने ।

जग्गाको मूल्यांकन पनि खड्काले नै गरेको र त्यही मूल्यअनुसार कागज गरिएको लामाको भनाइ छ । आफैँले गरेको कागजको दायित्वबाट उम्किन खड्काले अपहरणको आरोप लगाएको दाबी उनको छ ।

यसअघि पनि लामामाथि अपहरण, फिरौती, सम्पत्ति शुद्धीकरणसहितका अभियोग लागेका छन् ।